Të paktën tetë ushtarë dhe tre militantë mbetën të vrarë në një sulm të realizuar nga këta të fundit ndaj një kazerme ushtarake në Jemen, lajmëruan burime zyrtare pasditen e së martës.
Persona të armatosur me automatikë qëlluan mbi postobllokun ushtarak në krahinën e Maribit, rreth 300 kilometra në lindje të kryeqytetit Sana’a.
Një numër i pacaktuar ushtarësh kanë mbetur të plagosur, në këtë sulm autorësia e të cilit besohet të jetë e al-Kaedës. Ndërkohë, më shumë se 120 persona besohet se janë vrarë në 48 orët e fundit në luftimet e ndodhura në krahinën e Abjanit.
Në bilancin tragjik përfshihen 100 militantë, 14 ushtarë dhe tetë udhëheqës fisnorë, të cilët ishin pjesë e komiteteve vendore të formuara prej Al-Kaedës.
Që prej largimit të presidentit Ali Abdullah Saleh, vendi më i varfër i Lindjes së Mesme është përfshirë nga një rigjallërim i lëvizjeve militanteske dhe atyre separatiste në rajone të ndryshme të vendit.
Aktualisht, rebelët islamikë kontrollojnë krahinën e Abjanit, e cila mbetet në duart e tyre pavarësisht mësymjeve të vazhdueshme nga ana e autoriteteve.
Top Channel
