Ban Ki Moon dënon sulmet në Siri
07/04/2012 03:50
Më shumë se 50,000 emigrantë minorenë të ardhur në Evropë janë zhdukur, thotë raporti (fotot)
30/04 18:38
Kreu i OKB-së, Ban Ki-moon, ka dënuar qeverinë siriane për sulme të reja ushtarake, pavarësisht marrëveshjes të aprovuar për t’i dhënë fund dhunës.
Ban Ki Moon tha se afati i 10 prillit për armëpushimin, nuk është një justifikim për të vazhduar vrasjet nga forcat besnike të presidentit, Bashar Al-Asad.
Aktivistët thonë se të paktën 100 njerëz janë vrarë gjatë dy ditëve të fundit pasi trupat intensifikuan operacionet. Më parë, Turqia kërkoi ndihmën e OKB-së pas një rritjeje të numrit të refugjatëve të ardhur.
Pasi foli me Ki Moon, ministri i Jashtëm Ahmet Davutoglu deklaroi se nurmi i refugjatëve është dyfishuar që kur zoti Assad ra dakord të implementonte planin e OKB-së dhe Ligës Arabe.
Plani 6-pikësh, i ndërmjetësuar nga ish-sekretari i përgjithshëm i OKB-së, Kofi Annan, parashikon një armëpushim të pjesshëm nga të gjitha palët më 10 prill, që të pasohet nga një armëpushim total më 12 prill.
Gjithësesi, opozita siriane, Shtetet e Bashkuara dhe shumë figura të tjera rajonale kanë shprehur skepticizmin e tyre mbi mundësinë e implementimit të planit nga Damasku.
Në fjalimin e ditës së premte, Ki Moon deklaroi se sulmet e fundit ndaj civilëve shkelin kërkesat e parashtruara nga Kombet e Bashkuara dhe i kërkoi qeverisë që të ndalë operacionet ushtarake.
“Dënojmë sulmet e autoriteteve siriane ndaj civilëve të pafajshëm, përfshirë gra dhe fëmijë, pavarësisht angazhimeve të marra nga qeveria për të ndalur përdorimin e armatimeve të rënda në zonat e banuara”, u shpreh Ki Moon.
Top Channel
