Francë, gjyqtari hebre në shënjestër
03/04/2012 00:00
Shefi i ushtrisë izraelite: Do t’i përgjigjemi sulmit të Iranit! Liderët botërorë bëjnë thirrje të mos hakmerret 15/04 22:37
Militantët islamikë të arrestuar në Francë po komplotonin të rrëmbenin
një gjyqtar hebre, kanë bërë të ditur burime policore për mediat
franceze.
Burimet deklaruan se disa nga të dyshuarit e arrestuar në bastisjen e së premtes kishin në plan të merrnin peng gjyqtarin Albert Levy, në qytetin lindor të Lionit.
Zoti Levy dhe familja e tij aktualisht janë nën mbrojtjen e policisë, saktësuan burimet e afërta me hetimet që po kryhen pas ngjarjeve të fundit me karakter islamik.
Shefi i Drejtorisë Qendrore të Shërbimeve të Brendshme, Bernard Squarcini deklaroi më herët se të dyshuarit ishin me kombësi franceze, të përfshirë në një stërvitje lufte kolektive, të lidhur me indoktrinimin e dhunshëm fetar.
Nga 19 personat e arrestuar në mbarë vendin ditën e premte, 16 kanë mbetur në arrest dhe seanca e parë dëgjimore do të mbahet së shpejti. Ndërkohë, ditën e hënë autoritetet franceze dëbuan nga vendi dy islamikë radikalë.
Arrestimet dhe dëbimet erdhën pasi atentatori islamik Mohamed Merah vrau shtatë persona në jug-perëndim të Francës, para se të vritej nga policia muajin e kaluar.
Një avokate e babait të tij algjerian thotë se ka prova që i biri u vetëdeklarua i pafajshëm në negociatat me policinë, që kishte rrethuar apartamentin e tij në Tuluz.
Por një burim pranë policisë franceze deklaron se provat në fjalë nuk përputhen me faktet e operacionit të forcave speciale.
Top Channel
