Paris, shpërthim në ambasadën indoneziane

Dëshmitarë pranë vendit të ngjarjes kanë deklaruar se kanë parë tre persona të linin një pako pranë selisë së ambasadës, e cila shpërtheu rreth orës 05:45, në një rreze prej 50 metrash.

Ndërkohë, burime të afërta me grupin hetimor bëjnë të ditur se një person e ka gjetur bombën brenda një çante të dyshimtë dhe pasi e ka parë, e ka hedhur atë pak metra më tej.

Bomba ka shpërthyer rreth 1 minutë më vonë, duke shkaktuar dëme ndaj disa ndërtesave dhe duke djegur disa automjete, ndërkohë që në momentin e shpërthimit rruga ishte bosh.

Ngjarja ka ndodhur në një nga lagjet më shik të Parisit, “XVI Arrondissement”, dhe për momentin nuk ka pasur asnjë marrje përsipër të përgjegjësisë për kryerjen e saj.

Në zonën në fjalë janë vendosur forca të shumta policore, ndërkohë që banorët e krahasojnë shpërthimin me atë të vitit 2004, kur një bombë e fshehur poshtë flamurit indonezian shpërtheu duke plagosur disa persona.

Kjo është një tjetër ngjarje e rëndë që trondit Francën, pas vrasjes së tre ushtarakëve dhe katër civilëve në një shkollë hebraike në qytetin jugor të Tuluzit.

Top Channel