Seria A, shtyhet Bolonja-Juventus, luan Milan

Reshjet e dendura të dëborës kanë bërë që fusha e stadiumit Dall’Ara të Bolonjës të mos jetë funksionale për takimin e së dielës mbrëma mes Bolonjës dhe Juventusit. E njëjta panoramë paraqitet edhe në fushën e Parmës, kryeqendrës emiliane. Parashikimet meteorologjike nuk janë aspak optimiste dhe dëbora e acari rrezikojnë seriozisht zhvillimin e të tjera takimeve të Serisë A.

Për momentin, përvec këtyre dy sfidave, ndeshjet e tjera parashikohet të luhen, duke nisur që nga ndeshja hapëse e javës, ajo mes Udinezes dhe Milanit që luhet në orën 18:00 dhe Kaljari-Palermo që luhet në orën 20:45 të ditë së sotme.

Ende nuk është vendosur një datë për zhvillimin e dy takimeve të shtyra, ndërsa për të njëjtat arsye, dy javë më parë u shty Parma-Juventus, e cila premton të zhvillohet në mesjavë, nëse moti nuk rezervon surpriza të tjera.

Milani përballë Udinezes me shumë mungesa

Milani do të përballet me Udinezen sot në orën 18:00, një sfidë shumë e vështirë kjo për kuqezinjtë, shto faktin që vuajnë mungesa të shumta cilësore në skuadër.

Jashtë fushës, përvec të dëmtuarve është edhe sulmuesi Zlatan Ibrahimovich, i ndëshkuar me 3 javë pezullim pas gjestit të kryer ndaj Aronica-s në ndeshje Milan-Napoli të një jave më parë.

Megjithatë, trajneri i Udinezes, Guidolin deklaroi se nuk ia “kishte besën” Milanit.

“Edhe pse pa Ibrën, Milani mbetet një skuadër superiore në krahasim me Udinezen dhe klasifikimi thotë se ata janë 3 pikë më shumë se ne dhe në cdo ndeshje kërkon të vendosë nën kontroll kundërshtarin, është një skuadër kampione, një ‘bishë e plagosur’ që duhet t’i druhemi më shumë”, deklaroi para mediave Guidolin.

Top Channel