Maqedonasit: Greqia na la!

Në mes të qindra banorëve të zonës që merrnin pjesë në këtë festë lokale është shfaqur një arkivol i mbuluar me flamurin grek dhe i shoqëruar me një lajmërim vdekjeje ku midis të tjerash shkruhej: “Lajme të mira! Pas shumë vitesh shqetësimesh, fqinji ynë i dashur, ish-krahina turke, Greqia apo Junanistani, na la në moshën 181-vjeçare, nga protokolli i Londrës në 1830, në atë të Hagës në 2011. Mbajnë zi SHBA, BE, Rusia, Serbia.”

Më pas është djegur edhe flamuri i Greqisë. Ngjarja ka krijuar reagime të mëdha në shtypin grek, ndërsa pritet reagimi i udhëheqjes politike.

“Shkupi varrosi Greqinë” është titulli i gazetës më të madhe të së dielës ‘Proto Thema’, kurse proqeveritarja ‘Ethnos’ shkruan në versionin online të saj: “Varrosën Greqinë dhe dogjën flamurin e saj në Shkup”.

Ngjarja vjen vetëm disa orë pas mesazhit që çoi Athina drejt Shkupit për të ndaluar politikën e sfidave, provokimeve dhe sulmeve ndaj Greqisë dhe thirrjes për të vërtetuar nëse ekziston apo jo vullneti politik për zgjidhje në çështjen e emrit.

Nëpërmjet zëdhënësit të Ministrise së Jashtme, Grigoris Delavekuras, Greqia ka protestuar ndaj udhëheqjes së Shkupit edhe për ngritjen e monumentit të Portës së Maqedonisë, inagurimi i të cilit u bë para disa ditësh. Ngjarjet e orëve të fundit nuk lënë vend për shpresa se negociatat e reja që fillojnë këtë javë në Nju Jork midis përfaqësuesve të dy shteteve fqinje me ndërmjetësimin e përfaqësuesit të OKB Methiu Nimic, do të sjellin diçka pozitive në çështjen kryesore që rri pezull për më se dy dekada midis Shkupit dhe Athinës.

Top Channel