Feith: T’i jepet fund mbikëqyrjes

Në një shkrim autorial në të përditshmen “Danas”, Feith është shprehur se tashmë Kosova është e aftë të qendrojë me këmbët e veta.

“Jam takuar me presidentin Ahtisari në Finlandë dhe kemi diskutuar për rezultatet e arritura gjatë katër viteve pavarësi të mbikëqyrur. Ai është dakord me mua që në kushte të caktuara, pjesa më e madhe e punës sonë ka përfunduar”, ka shkruar Feith.

Megjithatë, ka nënvizuar ai, para se të mbyllet procesi i mbikëqyrjes autoritetet kosovare duhet të përfundojnë disa detyra të rëndësishme.

“Detyra kryesore është decentralizimi në veri të Kosovës dhe formimi i komunës së re të Mitrovicës së veriut, si simbol i këtij procesi”, ka theksuar Feith.

Ai është shprehur se ekziston nevoja për një bashkëpunim më të fortë mes veriut dhe jugut të Kosovës dhe ka vlerësuar se bllokimi i rrugëve nuk është një veprim i denjë për një vend që synon afrimin me familjen evropiane.

“Bllokimi i rrugëve dhe pengimi i lëvizjes së lirë janë hapa prapa dhe të padenja për rajonin që synon anëtarësimin e plotë në familjen evropiane”, ka nënvizuar Feith.

Shumë probleme, ka shtuar ai, janë shkaktuar nga qëndrimi i vazhdueshëm jofleksibël i Serbisë ndaj Kosovës, “qëndrim që nuk ka vend në Evropë dhe që dëmton sa Kosovën aq edhe Serbinë”.

Top Channel