Ministri serb për Kosovën, Goran Bogdanovic, deklaroi se Serbia nuk do të eliminojë strukturat e saj paralele në veri të Kosovës.
Në një intervistë për të përditshmen serbe “Vecernje Novosti”, ai u shpreh se kërkesa për tërheqjen e institucioneve nga veriu ishte “tërësisht e papranueshme” për autoritetet e Beogradit.
”Kërkesa që Serbia të tërheqë institucionet e saj nga veriu i krahinës, të cilat nuk janë paralele, por janë të vetmet institucione të ligjshme, është tërësisht e papranueshme”, u shpreh Bogdanovic.
Sipas tij, diçka e tillë ndalohet në radhë të parë nga kushtetuta, e cila detyron Beogradin që të garantojë të drejtën për kujdes shëndetësor, arsimim, punësim dhe për mbrojtje civile ndaj të gjithë qytetarëve në territorin e Serbisë.
Megjithatë, Bogdanovic shtoi se “qytetarët serbë në veri të Kosovës duhet të heqin dorë nga barrikadat, pasi ato e kanë kryer misionin e tyre dhe tashmë janë të panevojshme”.
Top Channel