Kosovë-BE, dialogu për vizat në janar

Sipas raportimeve të “RTK”, që citon burime pranë Komisionit Evropian, komisionerja e Cështjeve të Brendshme, Cecilia Malmstrom i ka propozuar këtë datë homologut kosovar Bajram Rexhepi.

Sipas “RTK”, më 19 janar Malmstrom do të vizitojë Prishtinën, ku dhe do të njoftojë zyrtarisht nisjen e dialogut mes palëve.

Burimi mediatik nënvizon se Brukseli vlerëson se Prishtina ka hyrë në rrugën e duhur për zgjidhjen e disa prej problemeve që janë dhe kritere për lëvizjen e lirë.

Kështu, autoritetet kosovare kanë bërë progres në procesin e riatdhesimit dhe riintegrimit, në instalimin e sistemeve të teknologjisë informative, në trajnimin e stafit të aeroportit dhe në komunikimin mes pushtetit komunal dhe atij qendror.

Në këtë drejtim zyrtarët evropianë kanë vlerësuar vizitat dhe bashkëbisedimet që kryeministri Hashim Thaci, ministri i Brendshëm Bajram Rexhepi dhe ministrja për Integrimin, Vlora Citaku kanë bërë me krerët e komunave të ndryshme.

Nëse konfirmohet, ky do të jetë një sinjal pozitiv që Bashkimi Evropian i jep Kosovës, në mënyrë që vendi ballkanas të mos mbetet një gropë e zezë në rajon.

Megjithatë, rruga do të jetë e gjatë, pasi presidenti i Këshillit të Evropës, herman Van Rompuy i bëri të qartë kryeministrit Thaci gjatë një takimi në Bruksel se, më parë duhet të plotësohen kushtet dhe pastaj të hiqen vizat.

Vetë Thaci, në mbledhjen e kabinetit të tij pas kthimit nga Brukseli, deklaroi se BE kishte marrë vendime të rëndësishme për Kosovën dhe se kriteret për heqjen e vizave do të plotësoheshin në një kohë rekord.

Top Channel