Ish-kancelari gjerman vlerëson Kosovën
12/12/2011 16:55
“Ai dhe shokët e tij i mungojnë vendit”, i ati i Hashim Thaçit pasi vizitoi të birin në Hagë: Punuan shumë që të jemi të lirë, duhet të jenë në Kosovë 19/05 17:43
Ish-kancelari gjerman Helmut Kohl ka vlerësuar përpjekjet e popullit të Kosovës për shtetin e tyre të ri. Ai këtë vlerësim e ka bërë gjatë një takimi pritës me ambasadorin e Kosovës në Gjermani, Vilson Mirdita.
Sipas agjencisë së lajmeve “INA”, diplomati kosovar zhvilloi një vizitë private në shtëpinë e ish-kancelarit të mirënjohur gjerman, në qytetin Ludvigshafen.
Gjatë takimit, Kohl ka trajtuar posacërisht cështjen e Kosovës, duke dhënë vlerësimet dhe sugjerimet e tij mbi rrugën që duhet të ndjekë vendi.
Sic bëhet e ditur, Kohl ka vlerësuar lartë përpjekjet e popullit të Kosovës për të qenë i lirë dhe për të ndërtuar një shtet demokratik.
Gjithashtu, ish-kancelari ka përshëndetur politikat që po ndërmerr vendi në përmbushjen e detyrimeve për të qenë pjesë e familjes evropiane.
Nga ana tjetër, zoti Kohl ka bërë një sërë kritikash ndaj politikave të zgjerimit të BE, duke nënvizuar se vendet e Ballkanit perëndimor duhej të ishin prej kohësh pjesë e familjes evropiane.
Më tej, shtojnë burimet mediatike, Kohl ka paralajmëruar se së shpejti, me gjithë dëshirë, mund të vizitojë Kosovën. Në këtë takim ka marrë pjesë edhe deputeti i CDU-së në Bundestag, Philip Missfelder.
Nga ana e tij, ambasadori Mirdita ka vlerësuar gjurmët e lëna në historinë moderne të kombit gjerman nga ish-kancelari Kohl, duke e vënë theksin tek bashkimi i dy Gjermanive.
Top Channel
