Liderët ndërkombëtarë, mes të cilëve kryeministri britanik David Cameron
dhe sekretarja amerikane e Shtetit Hillary Clinton, ndodhen në Paris
për të diskutuar mbi të ardhmen e Libisë.
Gjithashtu, sekretari i përgjithshëm i OKB-së do të jetë i pranishëm në konferencën “Miqtë e Libisë”, e organizuar nga presidenti francez Nicolas Sarkozy.
Rreth 60 vende dhe organizata do të jenë të pranishme në të, përfshirë Rusinë, e cila ditën e enjte njoftoi njohjen e Këshillit Kombëtar të Tranzicionit si autoriteti legjitim i Libisë.
Edhe qeveria kineze ka njoftuar se do të jetë e pranishme përmes të dërguarit të saj në këtë konferencë të madhe.
Ndërkohë, pritet që anëtarët e KKT-së të bëjnë presion për lirimin e fondeve të mëtejshme, pas zhbllokimit të 3.1 miliardë dollarëve në asete të ngrira nga SHBA dhe Britania në javët e fundit.
Ditën e djeshme, 140 milionë stërlina, pronë e shtetit libian, u dërguan nga forcat ajrore britanike për në Libi, si kësti i parë i shumës prej 950 milionë stërlinash që do t’i dorëzohen Bankës Qendrore të Libisë.
Konferenca “Miqtë e Libisë” zhvillohet një ditë pas mesazhit të të birit të kolonelit Muammar Gaddafi, Saif al Islam, se fitorja e regjimit është shumë pranë.
Saif deklaroi se ndodhej në rrethinat e Tripolit, se babai i tij është mirë dhe u bëri thirrje rebelëve që të dorëzohen.
“Rezistenca vazhdon dhe fitorja është shumë pranë”, deklaroi Saif al Islam përmes një mesazhi audio.
Top Channel
