Poloni, përmbyset treni, 4 viktima

Një tren pasagjerësh, i nisur nga Varshava për në Katovicë, ka dalë nga shinat e është përmbysur duke marrë jetën e katër pasagjerëve e duke plagosur më shumë se 20 të tjerë.

Nuk dihet me saktësi çfarë e shkaktoi aksidentin e rëndë. Sipas punonjësve të shpëtimit dhe zjarrfikësve në vendngjarje që kanë nxjerrë me shumë mundim një numër njerëzish nga vagonët e përmbysur, bilanci i viktimave mund të rëndohet akoma më tej.

Në bordin e trenit mendohet të kenë qenë rreth 300 persona. Vetë drejtuesi i tij është në mesin e të mbijetuarve.

Disa nga pasagjerët rrëfyen për mediat vendase se kishin dëgjuar një zhurmë të fuqishme.
Vagoni i parë ishte shkatërruar krejtësisht, ndërsa tre të tjerët ishin anuar.

Treni nuk duket të ketë goditur ndonjë objekt në rrugën e tij, por nga dëshmitë e disa të mbijeturave rezulton se ai ka nisur befas të ngadalësojë e më pas ka dalë nga shinat.  

Top Channel