Leku shqiptar u këmbye vazhdimisht poshtë kuotës 140 lekë për euro gjatë
javës së fundit, duke treguar rezistencë, ndërsa kursi i këmbimit me
dollarin pësoi luhatje të konsiderueshme si pasojë e luhatjes së
monedhës amerikane ndaj euros në tregun ndërkombëtar
Sipas të dhënave të Bankës së Shqipërisë, javën e fundit kursi i këmbimit mesatar fiks mes euros dhe lekut ka lëvizur mes nivelit 139.5 lekë për euro dhe 140. Euro kushton aktualisht më lirë nga sa kushtoi në gjashtë muajt e fundit.
Ndërkohë, të dhënat historike të Bankës së Shqipërisë, sipas “Shqip”, vënë në dukje se gushti ka efekte sezonale te kursi i këmbimit, por këto efekte sezonale kanë ardhur duke u pakësuar gjatë viteve të fundit dhe nuk janë një rregull absolut. Tendenca e përgjithshme është që euro kushton në gusht po aq sa në korrik dhe në shumë raste, edhe më lirë.
Leku u forcua në gushtin e 2003-shit me 2.2 për qind kundrejt euros, por gjatë viteve të tjera ndryshimet me korrikun kanë qenë minimale.
Luhatjet sezonale të vlerës së lekut kanë ekzistuar që prej dy dekadash. Për shkak të shtimit të prurjeve valutore gjatë verës dhe festave të dhjetorit nga emigrantët, leku është forcuar. Por një faktor tjetër i rëndësishëm për forcimin e lekut në dhjetor besohet se është edhe rritja e huamarrjes së brendshme të qeverisë për të mbyllur llogaritë vjetore të buxhetit, gjë që shkakton tërheqje të përkohshme të lekut nga tregu e rrjedhimisht forcim të tij.
Të dhënat e publikuara nga Banka e Shqipërisë tregojnë se që nga viti 2002, fluktuacionet sezonale të lekut kanë ardhur në pakësim, kryesisht për shkak se bankat janë prirur nga blerja e valutës kur ajo është e lirë, gjë që ka sjellë edhe eliminimin e pjesshëm të efektit sezonal.
Top Channel
