Bogdanovic: Jo përdorimit të dhunës e armëve

Duke folur për radio B92, Bogdanovic bëri me dije se pala serbe fton për qetësi dhe për mos tensionim të gjendjes, ndërkohë që mediat kosovare raportojnë se barrikadat qëndrojnë ende në rrugë.

Zyrtari serb theksoi se në takimin që pritet të zhvillohet sot me komandantin e KFOR-it, Erhard Byler, do të paraqesë propozime konkrete.

Kryq në rrugën kryesore

Në rrugën kryesore Mitrovicë- Rashkë, në Rudare të komunës së Zveçanit, serbët kanë vendosur një kryq të lartë rreth shtatë metra.

Sipas Telegrafit, serbët kanë vënë kryqin që është një konstruksion metali, në rrugën ku kanë vendosur prej tashmë 9 ditësh barrikada.

Mediat serbe raportojnë se serbët kanë përsëritur deklaratat e përfaqësuesve të tyre se nuk do të largohen derisa të kthehet gjendja para 25 korrikut.

SHBA: Të hiqen barrikadat në veri

Zëvendësndihmës sekretari amerikan i Shtetit, Tomas Kantrimen ka konfirmuar se vendi i tij mbështet fuqishëm sovranitetin e shtetit të Kosovës, ndërsa ka bërë të qartë se barrikadat e vendosura nga serbët në veri duhet të largohen.

Në një intervistë dhënë RTK-së, Kantrimen ka ripërsëritur qëndrimin e Shteteve të Bashkuara të Amerikës se ndarja e Kosovës nuk do të ndodhë, edhe pse disa politikanë serb e preferojnë një gjë të tillë. Ai shprehu shqetësimin e Uashingtonit zyrtar lidhur me zhvillimet e fundit në veri të Kosovës.

Për më tepër, Kantrimen ka thënë se SHBA përkrah shtrirjen e sovranitetit në gjithë territorin e Kosovës. Duke folur për embargon e dyanshme, Kantriman i ka quajtur vendimet të paligjshme.

Top Channel