Dy forcat kryesore të shqiptarëve në Maqedoni, Bashkimi Demokratik për
Integrim dhe Partia Demokratike Shqiptare, vlerësojnë se përcarja e
votave në shumë parti është arsyeja kryesore që shqiptarët në këto
zgjedhje morën 4 mandate më pak se në përbërjen e kaluar.
“Arsyeja kryesore për këtë situatë sipas analizës tonë është jo dalja e vogël e elektoratit shqiptar por përcarja e votës shqiptare ose forcës së elektoratit shqiptar në Maqedoni”, thotë sekretari i përgjithshëm i BDI-së, Abdilaqim Ademi
“Numri i deputetëve ishte si rezultat i përcarjes së votës opozitare. Këta opozitarë parandaluan fitoren e partisë më të madhe opozitare shqiptare mbajnë përgjegjësinë më të madhe”, thotë Menduh Thaçi, kryetar i PDSH-së.
Partitë shqiptare në zgjedhjet e së dielës kanë siguruar gjithsej 25 ulëse në Parlamentin e Maqedonisë, 4 me pak se në zgjedhjet e kaluara parlamentare, në të cilat patën fituar 29 deputete.
Partitë shqiptare nuk ia dolën të sigurojnë asnjë mandat as në zgjedhjet që u organizuan për herë të parë në diasporë.
Sipas afateve ligjore Parlamenti i ri do të konstituohet më 25 qershor, ndërsa në seancën e parë deputetët do të verifikojnë mandatet e tyre. Qeveria e re duhet të votohet deri më 10 gusht.
Top Channel
