Që prej orës 10 të ditës së djeshme, anëtarët e KZAZ-së nr 49 kanë patur një sërë mosmarrëveshjesh për firmosjen e tabelës përmbledhëse të procesverbaleve që kanë dalë pas numërimit të votave për kryetar bashkie.
Katër anëtarët e Partisë Demokratike, që përbëjnë edhe shumicën, kundërshtuan firmosjen e tabelës, pasi sipas tyre në një procesverbal ka lapsuse në drejtshkrim.
Gjatë paradites së sotme, situata ishte e pandryshuar duke bllokuar procesin e numërimit të kutive për minibashkinë.
Mosmarrëveshjet për tabelën përfundimtare do të mbërrijnë në KQZ bashkangjitur me një procesverbal ku janë shënuar të gjitha vërejtjet e shumicës në këtë KZAZ.
“Procedohet kështu, s’është më në kompetencat e KZAZ-së por të KQZ-së. Është marrë një vendim për tabelat, kështu që kalon tek KQZ-ja. Ne përcjellim dokumentacionin dhe KQZ vendos”, deklaroi Blerina Gjylameti.
Gazetarët fillimisht janë ndaluar të raportojnë nga kjo KZAZ, duke iu refuzuar hyrja nga policët e shërbimit.
“Ka një vendim të KZAZ-së që të mos futeni. Nuk e di motivin, ne marrim vetëm urdhëra”, tha oficeri përgjegjës i policisë.
Është dashur edhe kësaj here ndërhyrja e disa vëzhguesve ndërkombëtarë që gazetarët, me urdhër të kryetarit të KZAZ-së të lejohen.
Top Channel