Edi Rama është shpallur fitues i zgjedhjeve lokale 2011, por kryeministri dhe kryetari i Partisë Demokratike, Sali Berisha ka kërkuar që të pritet ende verdikti zyrtar nga Komisioni Qendror Zgjedhor për shpalljen e kandidatit fitues të Bashkisë së Tiranës.
Diskutimet nëse duhet ose jo të merren parasysh fletët e pavlefshme, të cilat edhe mund të ndryshojnë rezultatin final janë kthyer në qender të vëmendjes.
Por përtej diskutimeve dhe qendrimeve të palëve qendron ligji i cili duhet të zbatohet nga anëtarët e Komisionit Qendror Zgjedhor.
Një rast i tillë është përsëritur edhe para 4 vitesh, pikërisht në zgjedhjet e vitit 2007, kur Lëvizja Socialiste për Integrim ka dorëzuar një projekt-udhëzim në KQZ ku kërkohej që fletët e votimit të hedhura gabimisht jo në kutinë e duhur, të konsideroheshin të vlefshme.
Komisioni Qendror Zgjedhor vendosi që për këtë rast të zbatojë dispozitat e Kodit Zgjedhor të përcaktuara në nenin 106, ku thuhet se fletët e votimit do të konsiderohen të kontestuara ose të pavlefshme sipas rastit.
Kryetari i KQZ në vitin 2007 Clirim Gjata ka deklaruar në atë kohë se kur numërohet një kuti votimi, rezultati i dalë që aty pasqyrohet në tabelën përkatëse, dhe ky rezultat nuk mund të ndryshojë më.
Ndërsa anëtari i KQZ, Klement Zguri ka thënë se për një rast të tillë nëse do të vendoset që fletët e votimit të gjetura jo në kutinë e duhur, të konsiderohen të vlefshme, kjo mund të krijojë shumë pështjellim dhe konflikt.
Zguri shtoi se fleta e votimit, e gjetur në kutinë e gabuar, duhet të konsiderohet e pavlefshme, pasi gabimet gjatë votimit mund të jenë të gjithanshme dhe procedurat që ndiqen janë të përcaktuara në ligj.
Top Channel
