Kosovë, debat në Kuvend për bisedimet

Deputetet e Kuvendit zhvilluan një debat të gjatë duke u ndarë në dy blloqe, pozitë dhe opozitë, ata shpalosën pajtimet dhe mospajtimet lidhur me dialogun me Serbinë.

Vetëvendosje u tregua më e ashpër duke e kundërshtuar dialogun, ndërkohë që pjesa tjetër e opozitës kërkoi nga qeveria pikat që do të diskutohen në mënyrë që në rast marrëveshje, ajo të ratifikohet nga parlamenti.

Fillimisht u propozuan 2 draft-rezoluta, njëra nga PDK që mbështet dialogun me Serbinë me kusht që të mos diskutohet statusi dhe integriteti territorial dhe tjetra nga Vetëvendojse kundër dialogut me Beogradin pasi ky i fundit nuk e njeh pavarësinë e Kosovës.

Ndërkohë 2 partitë e tjera opozitare, AAK dhe LDK kërkuan që qeveria të bëjë publike axhendën e bisedimeve në mënyrë që cdo marrëveshje që del prej tyre të ratifikohet nga Kuvendi.

Por kryeministri Thaci u shpreh se Kosova ka gati platformën e saj për bisedimet me Serbinë që nga muaji shtator, para se të miratohej rezoluta e OKB-së.

“Unë si kryeministër ju garantoj se Kosova ka platformën e bisedimeve që nga shtatori i vitit të kaluar. Kjo platformë është përgatitur përpara se të aprovohej rezoluta për Kosovën në Asamblenë e Përgjithëshme të OKB-së”, tha kryeministri Thaci.

Pas më shumë se 6 orë debat deputetët nuk ranë dakort për hartimin e një rezolute për bisedimet. Seanca e radhës për dialogun me Serbinë do të mbahet të enjten. Deri në këtë ditë deputetët do të punojnë në harmonizimin e qendrimeve të tyre për të dalë me një rezolutë të përbashkët për bisedimet me Serbinë që startojnë ditën e sotme në Bruksel.

Top Channel