Jemen, protestat hyjnë në ditën e shtatë

Sipas korrespondentëve të huaj në Jemen, të shtëna sporadike janë dëgjuar gjatë ditës së sotme, por nuk dihet ende nëse këto të shtëna kanë prodhuar viktima.

Megjithatë, protestat e sotme janë dukshëm më të qeta se ato të një dite më parë, kur mbështetës të regjimit u përballën me gurë, shkopa hekuri dhe sende të tjera të forta me demonstruesit antiqeveritarë.

Siç raportuan më parë mediat ndërkombëtare, me dhjetëra protestues u dërguan në spital për plagët e marra në kokë, ndërsa policia ishte e pafuqishme të ndërpriste betejën e stilit mesjetar në rrugët e kryeqytetit.

Të frymëzuar nga rrëzimi i regjimeve në Tunizi dhe Egjipit, jemenasit nuk janë të kënaqur nga premtimi i presidentit të tyre, Ali Abdullah Saleh, për t’u larguar me mbarimin e mandatit në vitin 2013, pas 32 vitesh në pushtet.

Jemeni është vendi më i varfër në Lindjen e Mesme. Presidenti Saleh ishte një kundërshtar i Shteteve të Bashkuara të Amerikës, kur deklaroi aleancën e tij me Saddam Hussein-in në luftën e Gjirit, në vitin 1990.

Megjithatë, ai është shndërruar tashmë në një alet të çmuar, për shkak të luftës së tij ndaj Al-Qaeda.
 

Top Channel