Lëvizja Vetëvendosje ka reaguar ndaj raportit të raportuesit të KiE, Dick Marty, duke e cilësuar atë si një tendencë të turpshme për të mëpërkëmbur luftën fisnike të UCK-së.
“Lëvizja Vetëvendosje konsideron se pretendimi për të njollosur UCK-në, këtë herë përmes Hashim Thacit, është një tendencë e turpshme dhe e papranueshme”, thuhet në një komunikatë.
Në dokumentin në fjalë, lëvizja e Albin Kurtit vlerëson se keqpërdorimi që individë të caktuar mund t’i kenë bërë veprimtarisë së UCK-së, nuk mund të cënojnë luftën fisnike të saj.
Më tej Vetëvendosje shpreh bindjen e saj se, paraqitja e këtij raporti nuk synon vënien në vend të drejtësisë, por ushtrimin e presionit ndaj Thacit, që të bëjë koncesione në bisedimet me Serbinë.
Nga ana tjetër, edhe organizatat e dala nga lufta e UCK-së kanë shprehur indinjatën e tyre ndaj raportit të Marty, duke e cilësuar atë si “të trilluar dhe me deklarata raciste”.
Top Channel