Koalicioni për Kosovë të Re në kuadër të fushatës elektorale, të martën prezantoi kandidatët me moshë të re që garojnë në zgjedhjet e 12 dhjetorit për Kuvendin e Kosovës.
Kreu i AKR-së, Behgjet Pacolli kritikoi qeverinë e deritanishme që nuk ka bërë asgjë për rininë. Ndërsa, kandidatja për kryeministre Mimoza Kusari Lila, tha se fakti që ajo si e re është kandidate për kryeministre dëshmon se ky koalicion ka në fokus rininë.
Në ditën e shtatë të fushatës parazgjedhore Lidhja Demokratike e Dardanisë ka mbajtur tubim me qytetarët e Fushë-Kosovës, nga të cilët ka kërkuar votën në zgjedhjet e 12 dhjetorit. Me LDD-në sipas kryetarit të saj nuk do të turpërohet asnjë qytetar i Kosovës.
Ndërsa nënkryetari i LDD-së, Lulzim Zeneli kërkoi nga qytetarët e Fushë-Kosovës që më 12 dhjetor t’i japin fund shkelësve të Kushtetuës, dhe t’i thonë po sovranitetit e përspektivës së Kosovës. Në fund u prezantuan tre kandidatët e LDD-së për deputetë të Kuvendit të Kosovës.
Në ditën e shtatë të fushatës parazgjedhore Lëvizja Vetëvendosje ka mbajtur tubim me qytetarët e Drenasit nga të cilët kërkoi votën më 12 dhjetor. Visar Ymeri nga Vetëvendosje u tha drenicasve se papunësia dhe varfëria janë shkaktuar nga politikanët e Kosovës.
Vetëvendosje prezantoi edhe 5 kandidatët për deputetë të kësaj ane. Ata kërkuan nga qytetarët që më 12 dhjetor të votojnë programin e vetëm që çon drejt bashkimit të kombit dhe që garanton zhvillimin e tij.
Drejtuesit e Partisë Fryma e Re u rikthyen edhe një herë në qytetin e Pejës për të vazhduar bashkëbisedimin me qytetarët rrugëve të këtij qyteti. Pejanëve u kërkua që ta votojnë numrin 25 të kësaj partie. Drejtuesit e FER premtuan se do të angazhohen për shtresat e ndryshme të shoqërisë. Drejtuesit e FER-it u kërkuan pejanëve që më 12 dhjetor të ndëshkojnë politikën e vjetër, që sipas tyre për 11 vite ata nuk kanë bërë asgjë për vendin e tyre.
Top Channel
