Kryeministri Thaçi premtoi se në rast të rimandatimit brenda 15 muajve të parë të qeverisjes Kosova do të përfshihet në procesin e liberalizimit të vizave dhe brenda 4 viteve Kosova do ta shohë veten e anëtarësuar në NATO.
Në vazhdim të intervistës së tij në Top Show kryeministri i Kosovës u shpreh i bindur për arritjen e objektivave. Ai tha se si qëllim në jetën e tij ka patur, lirinë e Kosovës, pavarësinë e saj dhe anëtarësimin e vendit në organizatat euro-atlantike.
Përsa i përket bisedimeve me Serbinë kryeministri tha se fakti që do të mbahet një dialog mes dy vendeve në një farë mënyrë është pranim i pavarësisë së Kosovës nga ana e Beogradit. Thaço përjashtoi mundësinë e diskutimit të çështjeve territoriale dhe të kufijve me Serbinë dhe u shpreh i bindur se në fund të këtij procesi bisedimesh Serbia do të njohë pavarësinë e Kosovës.
“Brenda 15 muajve nis procesi i liberalizimi të vizave ndërsa brenda mandatit 4 vjeçar vendi do të anëtarësohet në NATO. Nisja e procesit të bisedimeve me Serbine është pak a shumë një njohje e Kosovës nga ana e Serbisë. Jam i bindur se Serbia në fund të procesit të dialogut do të njohë Kosovën si shtet të pavarur. Kosova nuk do të diskutojë për kufijtë dhe territorin”, u shpreh kryeministri në ikje i Kosovës, Hashim Thaçi.
Lideri i PDK-së në fund të fjalës së tij premtoi gjithashtu se brenda katër vitesh Kosova do të arrijë njohjet e nevojshme të pavarësisë për t’u anëtarësuar në OKB.
Top Channel
