Cinike, konkrete, e saktë e mbi të gjitha që nuk e vë asnjëherë në rrezik fitoren. Kjo është fytyra e skuadrës së Lacios në këtë sezon të Serisë A.
Bardhekaltërit kanë arritur një tjetër fitore të rëndësishme, siç ishte ajo ndaj Palermos në Siçili, me rezultatin 0-1.
Fati i takimit u vendos nga një gol i shënuar nga Andre Dias në minutë e 27 të takimit. Në minutat në vazhdim, vendasit e Palermos kontrolluan thuajse të gjithë lojën, por rreshtimi i saktë në mbrojtje i skuadrës kryeqytetase dhe disa gabime të vetë siçilianëve në sulm, penguan ndryshimin e rezultatit, Lacio fiton 0-1.
Në ndeshjet e tjera Udineze mundi në transfertë Barin 0-2, Napoli po në transfertë fitoi minimalisht 0-1 me Breshian, ndërsa Kaljari mundi 2-0 Bolonjën. Cezena, ku luan edhe Bogdani u mund në fushën e saj 0-1 nga Sampdoria, ndërkohë që Parma e Kievo ndanë nga 1 pikë pas barazimit të bardhë 0-0.
Skuadra kryeqytetase vazhdon të mbajë e vetme kreun me 22 pikë dhe e shkëputur 4 pikë nga vendi i dytë që mbahet nga Interi me 18 pikë. Milan ndjek me 17 pikë në vendin e tretë, ndërsa Juventus mban vendin e katër me 15 pikë, po aq sa Napoli.
Në mbrëmje luhet ndeshja Katania-Fiorentina, që mbyll javën e nëntë të Serisë A.
Top Channel
