Në fund të vitit Kosova do të marrë lajme pozitive nga Komisioni Evropian, në kuadër të procesit të liberalizimit të vizave. Megjithëkëtë është më e rëndësishme puna që do te bëhet në shtetin e ri.
Kështu tha eurodeputetja sllovene Tanja Fajon, gjatë një takimi me grupin punues ndërministror për çështje të heqjes së regjimit të vizave.
“Jam e sigurtë që do të jetë një rrugë e gjatë. Mirëpo mirëpres që në fund do të kemi një rezultat të mirë. Kam shenja nga Komisioni Evropian që Kosova do të marrë lajme pozitive nga fundi i vitit. Mirëpo e rëndësishme është ajo që bëhet këtu. Sepse, të gjitha rezultatet që i keni do ta përshpejtojnë procedurën. Prandaj, përqëndrohuni në atë që do të bëni në muajt e ardhshëm”, u shpreh Fajon.
Zyrtarët qeveritarë vazhdojnë t’i thonë europianëve se heqja e vizave për qytetarët e Kosovës nuk do ta dëmtonte Bashkimin Evropian, por përkundrazi, Kosova ka vlera të mjaftueshme për t’i sjellë komunitet evropian.
Ndërsa, shoqëria civile shpeshherë ka ngritur shqetësimin e izolimit të Kosovës pas heqjes së mundshme të vizave për Shqipërinë dhe Bosnjën, duke e përkufizuar me fjalët: “Kosova, të jetosh në geto”.
Top Channel
