Hoxha: Akuzat politike, simetri PD-PS

Duke folur në emisionin “Top Story” në Top Channel, Hoxha ka kritikuar dy partitë më të mëdha për faktin se në akuzat e tyre nuk kanë treguar ligjet e shkelura.

“Gjej simetri mes palëve për akuzat për korrupsion dhe në asnjë rast palët nuk tregojnë se, ky është ligji i shkelur, apo ky është neni i shkelur. Kauza që ngrenë palët janë përdorimi i disa fakteve në mënyrë që të krijojnë idenë e një konspiracioni për përfitime”, ka pohuar Hoxha.

Sipas tij, përjashtim në këtë valë akuzash bën vetëm rasti i deputetit socialist Ilir Beqja, i cili e ka sqaruar pozicionin e tij.

“I vetmi rast që është treguar se është shkelur neni 70 i Kushtetutës, është ai i deputetit Ilir Beqja. Është lidhja e një kontrate që ndoshta nuk duhej lidhur duke qenë se mandati i deputetit ka filluar më vonë”, është shprehur Hoxha.

Ndërsa akuzat për rastet e tjera, nënvizon ai, janë shumë më të rënda pasi kanë të bëjnë me korrupsion dhe kontrabandë në nivelet e larta të pushtetit.

“Skandalet e tjera janë me kontrabandë e korrupsion. Këtë stil e nisi PS dhe po e kopion PD me fakte të tjera. Palët po përpiqen të krijojnë një axhendë të re në politikë, në vecanti PS që do ta pasojë me protestat e saj”, ka shtuar Hoxha.

Top Channel