Sërish tension në Irlandën e Veriut, ndërsa autoritetet janë bërë sërish objektiv i sulmeve të disidentëve republikanë.
Një bombë shpërtheu në qytetin Lurgan duke plagosur 3 fëmijë, ndërkohë që zhvillohej një paradë protestantësh.
Sipas policisë, mjeti shpërthyes kishte si objektiv forcat e rendit, të cilat përmes një telefonate anomine ishin lajmëruar për një bombë në shkollë.Dyshohet se eksplozivi duhej të shpërthente ndërsa policët kërkonin bombën e rreme.
Ky është sulmi i radhës që kryhet në qytetin Lurgan, një prej më të dhunshmëve në Irlandën e veriut, e cila edhe pas çarmatimit të organizatës IRA, vazhdon të mos gjejë qetësi.
Banorët e veriut të ishullit kanë shprehur shqetësimin se këto incidente të shpeshta do të kthejnë vendin në dhunën e dikurshme.
Top Channel
