Pas muajsh të tërë akuzash dhe kundërakuzash vjen edhe prishja përfundimtare në marrëdhëniet diplomatike mes Venezuelës dhe Kolumbisë.
Tërheqja nga të gjitha raportet diplomatike mes dy vendeve amerikano-latine ka ardhur prej liderit të Karakasit, Hugo Çavez, i cili ka ndërmarrë hapin ekstrem pas asamblesë së jashtëzakonshme të Organizatës së Shteteve Amerikane.
“Jam i detyruar të njoftoj prishjen e marrëdhënieve me Bogotan pas asamblesë së jashtëzakonshme të OSHA-s në Uashington, ku ambasadori kolumbian Luis Alfonso Hojos akuzoi se të paktën 1500 guerrilas të FARC-ut strehohen në 87 lokacione në territorin venezuelian”, tha në deklaratën e tij për mediat vendase presidenti Çavez.
Marrëdhëniet mes Kolumbisë dhe Venezuelës, që nga ardhja në pushtet e Çavezit në Karakas kanë qënë të tensionuara. Kolumbia akuzon fqinjin e saj për strehim dhe ndihmë materiale ndaj rebelëve të FARC-ut, akuza këto që mohohen prej Venezuelës.
Ndërkaq pas vendimit për prishje të marrëdhënieve mes dy vendeve fqinje amerikano-latine, ka reaguar edhe Uashingtoni, i cili e ka cilësuar vendimin e Çavezit një vendim të nxituar dhe një mënyrë jo shumë e mirë për të reaguar.
Top Channel
