Gjendet i vdekur polici i zhdukur

Trupi i pajetë i Foto Buhalit, i cili rezultonte i zhdukur që prej muajit shkurt të vitit të kaluar, është gjetur gati i dekompozuar nga disa fëmijë në lagjen “Kala” të qytetit të Beratit, në një banesë private të braktisur.

Burime zyrtare të Policisë së Beratit bëjnë me dije se rreth orës 11:00 të paradites së djeshme është marrë informacioni për gjetjen e një kufome në lagjen periferike “Kala”. Informacioni i mbërritur në sallën operative ka bërë me dije se kanë qenë disa fëmijë të lagjes, të cilët ishin futur për të luajtur në banesën që nuk jeton njeri dhe në oborrin e pasmë të saj kanë parë mes shkurreve trupin e pajetë të një njeriu.

Të frikësuar ata kanë lajmëruar banorët e lagjes dhe më pas policinë. Menjëherë pas marrjes së këtij informacioni ekspertët e policisë kanë mbërritur në vendin e sinjalizuar. Sipas ekspertëve të policisë, menjëherë pas verifikimit të të dhënave është konstatuar se bëhej fjalë për 53-vjeçarin Foto Buhali, i cili ishte deklaruar i zhdukur prej 14 muajsh.

Identitetin e kufomës e kanë pohuar edhe familjarët e 53-vjeçarit. Trupi i pajetë, pjesërisht i dekompozuar, është dërguar më pas në morgun e spitalit të Beratit, ku i është nënshtruar ekspertizës mjekoligjore për të mësuar shkaqet e vdekjes së Buhalit. Nga ekspertimi mjekoligjor ka rezultuar se 53-vjeçari, ish-gardian i paraburgimit të Komisariatit të Beratit, i kishte dhënë fund jetës duke u vetëvrarë me armën e tij të shërbimit.

Nga ekspertiza është përcaktuar se shkak i vdekjes ka qenë vetëqëllimi në gjoks me një armë, tip pistoletë. Arma me të cilën 53-vjeçari ka kryer aktin e vetëflijimit, ka rezultuar të jetë pistoleta e tij e shërbimit.

Foto Buhali, babai i dy fëmijëve, rezultonte i zhdukur që prej fundshkurtit të vitit të kaluar. Pas shërbimit në punë, ai nuk ishte kthyer në banesë dhe ishte larguar në drejtim të paditur, ndërkohë që me gjithë kërkimet e vazhdueshme të familjarëve dhe policisë nuk u gjet asnjë gjurmë e tij. Dëshmitarët e fundit patën deklaruar se e kishin parë duke tërhequr rrogën dhe më pas është zhdukur pa lënë gjurmë.

Sipas ekspertëve të policisë, 53-vjeçari, baba i dy fëmijëve, i ka dhënë fund jetës në një moment depresioni, për shkak të humbjes së lekëve të punës mujore në baste sportive. Por, ndonëse policia dhe familjarët ushtruan kontrolle të shumta në të gjithë lagjen “Kala” dhe gjithë kodrat e saj, trupi i pajetë u gjet rastësisht dje nga disa fëmijë të lagjes.

Top Channel