Është vetëm 15 vjeç, quhet Kamer Qaka, ka lindur në Grabovc të Pejës dhe që nga 1998-a jeton në Norvegji, por është një talent i lakmuar nga klubet të njohura të futbollit europian, ndër të cilat më i interesuar duket gjiganti spanjoll, Barcelona.
Në Norvegji, ku edhe militon si lojtar në radhët e Valerengës, vlerësohet një ndër më të talentuarit. Lajmi është bërë i njohur nga e përditshmja e njohur norvegjeze “Dagbladet”.
Po ashtu është konfirmuar edhe nga Adem Qaka, babai i talentit. “Më kontaktojnë çdo ditë menaxherët e Barcelonës, për të më kërkuar ta dërgoj djalin në akademinë e tyre. Ata e ndjekin Kamerin në çdo ndeshje. Përveç Barçës, për të interesohen dhe klube të tjera europiane, si Hamburg e Verder Bremen në Gjermani, Blekbërn Rovers në Angli, Brondbi në Danimarkë dhe disa nga klubet më të forta norvegjeze. Blekbërn e Brondbi e kanë testuar më herët dhe drejtuesit e këtyre dy klubeve menjëherë kanë bërë ofertë”, është shprehur Adem Qaka.
E njeh mirë futbollin: pozicioni i tij është mesfushor, zotëron teknikë dhe shpejtësi. Luan me të dyja këmbët dhe është i fuqishëm. Ekspertët norvegjezë e krahasojnë me yllin e Barcelonës, Lionel Mesin, i cili është edhe idhulli i tij. Më 11 prill, ditën e ditëlindjes, firmosi kontratë profesionale për dy vite me Valerengen, duke u bërë kështu lojtari më i ri në Norvegji që nënshkruan kontratë profesionale.
Tashmë i ka shanset të grumbullohet në ekipin e parë, por për të luajtur në formacion është ende shumë herët. Edhe pse dy vjet më i vogël, i plotëson të gjitha karakteristikat e ekipit të të rinjve U-17. Klubi i Valerengas nuk dëshiron lëshojë para 2011-s dhe kërkon të fitojë të paktën 20 milionë euro nga shitja e tij. Por edhe i ati dëshiron që ai të përfundojë një herë shkollën. Vetë Qaka ëndërron që një ditë të luajë për Realin e Madridit. “Më vjen mirë që Barcelona po interesohet për mua, por mua më pëlqen Reali i Madridit. Jam i bindur se një ditë do të luaj për këtë skuadër”, thotë talenti.
Top Channel
