Koret raciste, reagon Athina zyrtare

27/03/2010 00:15

Pas shfaqjes në thuajse të gjitha mediat greke të videos me kore e thirrje raciste dhe fyese ndaj shqiptarëve, Athina zyrtare nxiton të reagojë.

Ministri grek i Mbrojtjes së Qytetarit Mihalis Kristosoidhis ka urdhëruar nisjen e një hetimi për të zbardhur kushtet në të cilat është zhvilluar akti që ndjell urrejtje, ndërsa komandanti i togës prej 36 zhytësve të marinës luftarake është pezulluar.

“Përsëris se në mënyrë kategorike të tilla sjellje nuk i përshtaten askujt që mban uniformë dhe është betuar para kushtetutës dhe ligjeve të shtetit” tha ministri Kristosoidhis duke shtuar se persona të tillë nuk kanë vend në radhët e marinës detare.

“Asnjë i palogjikshëm nuk ka të drejtën të njollosë ditën historike me parrulla raciste që ndjellin urrejtje”, përfundon ministri grek.

Ndërkohë nga Ministria e Mbrojtjes greke nuk ka patur reagime pasi toga në fjalë ndodhet nën varësinë e marinës detare.

Akti ka ndarë edhe politikën. Keshtu aleanca e majtë, “Siriza” ka dënuar koret raciste si “të turpshëm, që kultivojnë nacionalizëm, ngjallin ndjenjat e urrejtjes dhe paralelisht mund të shkaktojë pasoja të rëndësishmë diplomatike, që mund të cënojnë marrëdhëniet e fqinjësisë së mirë”.

Ndërsa e ultranacionalistet e “Laos”, kanë dalë në mbrojtje të 36 marinarëve. Ata i cilësuan marinarët “heronj që japin jetën për të mirën e atdheut” dhe parrullat “flamuri i kombit”.

Top Channel