Pas humbjes 1-0 në sfidën e parë gjysmëfinale të Kupës së Shqipërisë, kundër Teutës, Vllaznia proteston kundër gjyqtarëve. Nëpërmjet një deklarate për shtyp, klubi shkodran kërkon nga FSHF-ja që të ndërhyjë për të zgjidhur problemin e arbitrimit.
“Klubi i futbollit, Vllaznia dëshiron t’i tërheqë edhe njëherë vëmendjen federatës për problemin e gjyqtarëve, sepse ata po kthehen në një gangrenë për skuadrën tonë nga ndeshja në ndeshje”, citohej në qëndrimin e drejtuesve të klubit kuqeblu.
Pretendimet lidhen me kartonët e kuq që Mrvaljeviç dhe Feniks morën të mërkurën, duke i cilësuar të nxituar nga gjyqtari Kridens Meta. “Ngremë zërin, sepse pas rastit me Laçin në kampionat, ku na u mohua një penallti, sulmet e gjyqtarëve kundër Vllaznisë po vazhdojnë. Kontestojmë kartonin e kuq për Mrvaljeviç: ndëshkimi është i pakuptimtë, pasi lojtari ndërhyri ndaj një kundërshtari në luftën në ajër dhe maksimalisht duhet të jepej vetëm karton i verdhë. Më pas, ai u shemb në tokë pas goditjes me kokë nga lojtari i Teutës dhe në mënyrë të pakuptimtë arbitri e largoi nga loja. Për kartonin e kuq të Feniks, lojtari gaboi, por ai nuk donte të prekte gjyqtarin me dorë. Kontakti ndodhi për inerci, sepse gjatë protestës arbitri ndaloi vrapin”, theksonte klubi shkodran.
Top Channel
