Këshilli Konsultativ i Biznesit aprovoi dje projektligjin “Për Sektorin Minerar në Republikën e Shqipërisë”.
I mbledhur nën drejtimin e ministrit Dritan Prifti, KKB diskutoi mbi draftin e hartuar nga METE dhe u shpreh në favor të tij, duke vlerësuar risitë që sjell ky projektligj në sektorin e lejeve minerare.
Të pranishëm në takimin e djeshëm të Këshillit Konsultativ të Biznesit ishin dhe dy zv/ministrat e Ekonomisë, Tregtisë dhe Energjetikës, Eno Bozdo dhe Neritan Alibali.
Në fjalën e tij, ministri Dritan Prifti vlerësoi draftin e projektligjit të hartuar nga METE dhe shprehu interesin për të dëgjuar mendimet dhe komentet e anëtarëve të Këshillit Konsultativ të Biznesit.
Prifti bëri të ditur se projektligji po rishqyrtohet nga Ministria e Ekonomisë, Tregtisë dhe Energjetikës, pas komenteve që kishin në adresë të tij grupet e interesit.
Ai vuri theksin te konceptet e reja që parashikon projektligji, siç është ai i ndarjes së rentës minerare me pushtetin vendor, ku propozimi i METE-s është që 25 për qind e vlerës së rentës minerare t’i kalojë pushtetit vendor.
Top Channel
