Kërkime për autorët e vrasjes së serbit

Sipas zëdhënësit të Policisë së Kosovës, Besim Hoti ende nuk ka as të dyshuar dhe as të arrestuar për incidentin që filloi si përleshje fizike mes shqiptarëve dhe serbëve në veriun e tensionuar të Mitrovicës.

​​“Policia ka bastisur edhe një shtëpi tjetër dhe në këtë fazë kemi në proces të intervistimit një person, por kurrsesi nuk mund të thuhet që ai është arrestuar, siç është raportuar në disa media”, tha për Radion Evropa e Lirë, Besim Hoti.

​​Ai shpjegoi se policia ka marrë deklarata nga qytetarët, banorë të kësaj lagjeje, në cilësinë e dëshmitarëve për të përshkruar atë çfarë në të vërtetë  ka ndodhur.

“Sipas pretendimeve të disa banorëve thuhet se grupi i personave janë futur në përleshje fizike, për qëllime, siç thonë ata, tentativë të vjedhjes, të disa shtëpive të banorëve shqiptarë aty. Sigurisht se një akt i tillë nuk justifikon përdorimin e armëve”, tha Hoti.

Policia e Kosovës ka bërë të ditur se në përgjithësi incidenti nuk ka reflektuar në aspektin e sigurisë.

I ashtuquajturi kryetar i Mitrovicës së veriut, Kërstimir Pantic, ka akuzuar njësinë speciale të Policisë së Kosovës për incidentin.
 
“Të gjithë e dinë të vërtetën, se ndaj serbëve kanë gjuajtur pjesëtarët e njësisë paraushtarake, ROSU, por të gjithë heshtin në lidhje me këtë”, transmetojnë deklaratën e Panticit, mediat serbe.

Kjo gjë është hedhur poshtë nga Policia e Kosovës, ndërkaq, zëvendëskryeministri Hajredin Kuçi ka bërë thirrje që të mos politizohet incidenti dhe mos të shërbejë për nxitje të dhunës.

Incidenti i së mërkurës mbrëma në lagjen “Kroi i Vitakut” të Mitrovicës, ku pas plagëve të marra vdiq një qytetar serb dhe dy të tjerë u plagosën, nuk do të ndikojnë në situatën e përgjithshmenë Veri.

Kështu deklarojnë në Qeverinëe Kosovës, por megjithatë, sipas zyrtarëve qeveritarë, incidente të tilla tensionojnë situatën në atë pjesë dhe nuk i kontribuojnë aktiviteteve të ekzekutivit.  

“Qeveria e Kosovës ka shprehur keqardhje për një incident të tillë. Natyrisht, e dënojmë incidentin dhe kërkojmë nga organet e drejtësisë që ta kryejnë punën e saj. Incidentet ndëretnike apo edhe incidentet me motive të tjera, pa marrë parasysh cilat mund të jenë, madje në rastin konkret, janë diçka që e tensionojnë situatën dhe nuk i kontribuojnë aktiviteteve që po i bëjmë ne”, deklaroi Hajderin Kuçi, zëvendëskryeministër i Kosovës.

Duke folur për ndikimin që mund të kenë incidentet e tilla në dialogun Kosovë-Serbi, Kuçi ka kujtuar se dialogu është çështje mes dy shteteve, ndërsa incidentet, sipas tij, ndikojnë në fuksionalizimin e shtetit të Kosovës

Top Channel