Von Sydow: Nevojiten reforma në shumë fusha

Gjatë takimit që u mbajt pa praninë e mediave, presidentja Jahjaga e ka njoftuar Sydow me zhvillimet në vend, me ç’rast ka theksuar faktin se Kosova synon përmbushjen e të gjitha standardeve për anëtarësim në Këshillin e Evropës dhe në të gjitha organizatat e tjera ndërkombëtare dhe rajonale.

Përmes një komunikate të lëshuar për media nga Zyra e Presidencës, publikuar nga Kosovapress bëhet e ditur se Jahjaga ka thënë se stabiliteti, demokracia dhe prosperiteti në gjithë rajonin janë vizion i qartë i Kosovës dhe se të gjitha vendet duhet të respektojnë dhe zbatojnë standardet evropiane.

Presidentja ka shtuar se mosmarrëveshjet në rajonin e Ballkanit duhet të zgjidhen përmes dialogut, respektimit të ndërsjellë dhe respektimit të integritetit territorial të secilit vend.

Në këtë rast, Jahjaga tha se Kosova si shtet qytetar dëshiron përfshirjen e të gjitha komuniteteve në ndërtimin e shoqërisë demokratike dhe se stabilizimi i gjendjes në veriun e Kosovës do të ndihmojë qytetarët serb atje. Ajo theksoi se barrikadat ose ndarja e Kosovës nuk janë rruga e integrimeve evropiane.

Ndërkaq raportuesi për Kosovën i Këshillit të Evropës, Bjorn von Sydow thuhet se ka shfaqur interesimin e tij për zhvillimet në Kosovë në të gjitha fushat, në veçanti në fushën e të drejtave të njeriut dhe të drejtave të komuniteteve.

Ai shtoi se Kosova ka një popullatë të re me potencial të madh dhe asaj i duhet zhvillim më i madh ekonomik. Sipas tij, Kosova deri tani ka bërë hapa të rëndësishëm, por theksoi nevojën e reformave në fusha të ndryshme.

Sydoë shfaqi interesim edhe për dialogun ndërmjet Kosovës dhe Serbisë për çështjet praktike të interesit të përbashkët dhe vlerësoi se të dyja palët duhet të tregojnë më shumë përkushtim për të gjetur zgjidhje të përbashkëta.

Top Channel