Libi, forcat anti-Gaddafi marrin Sirten

Lajmin e kanë bërë të ditur dëshmitarë dhe gazetarë të mediave ndërkombëtare, të cilët kanë deklaruar se ofensiva finale zgjati rreth 90 minuta, deri në mëngjesin e së enjtes.

Trupat qeveritare u angazhuan në një betejë të ashpër për Sirten, vendlindja e Gaddafi-t, për disa javë rresht.

Problemi më i vështirë për trupat e Këshillit Kombëtar të Tranzicionit ka qenë ai i snajperëve të vendosur në qendër të Sirtes.

Por të enjten në mëngjes, kreu i operacioneve qeveritare deklaroi për agjencinë e lajmeve “Reuters” se: “Sirte është cliruar”.

“Nuk ka më trupa të Gaddafi-t. Aktualisht ne po ndjekim luftëtarët e tij që po përpiqen të arratisen”, ka deklaruar koloneli Yunus al Abdali.

Muammar Gaddafi, që ka qeverisur Libinë për 42 vjet, u rrëzua nga pushteti në muajin gusht kur trupat rebele morën kontrollin e Tripolit. Vendndodhja e tij mbetet mister, ndërkohë që disa anëtarë të familjes së tij janë larguar nga vendi.

Të paktën 16 luftëtarë të tij janë kapur dhe disa kamionë të mbushur me armë e municione janë bllokuar, raporton agjencia e lajmeve “Associated Press”.

Ndërkohë, disa nga besnikët e liderit të rrëzuar janë ende duke bërë rezistencë në qytetin Bani Ualid, në jug-lindje të Tripolit.

Top Channel