Problemet e Interit, Spalletti merr përsipër përgjegjësitë

04/02/2018 14:35

Interi nuk arriti të fitojë as ndaj Crotones, e tashmë shqetësimi te zikaltrit është rritur edhe më shumë.

Zikaltrit nuk e njohin shijen e suksesit që pas fitores 5-0 me Chievon, në muajin dhjetor, e trajneri Spalletti ende nuk ka mundur të gjejë një zgjidhje për daljen e skuadrës së tij nga kriza e rezultateve.

“Jam i shqetësuar – tha Spalletti. – Nuk arrijmë të reagojmë kur është e nevojshme. Tani duhet të bëjmë vetëm një gjë për të ecur përpara: Të punojmë shumë çdo ditë. Kjo është e vetmja mënyrë për të dalë nga ky moment i vështirë”.

Por trajneri toskan shkoi edhe më tej, teksa kritikoi veten e tij për këtë situatë të krijuar tek Interi.

“Nuk i shoh futbollistët e mi indiferentë, u vjen vërtet keq. Faji është vetëm i imi, e kjo do të thotë se jam unë ai që po gaboj. Jam unë ai që duhet të marr përsipër përgjegjësitë, sepse klubi më ka dhënë besimin. Do të gjejmë mënyrën për të analizuar punën time, por nuk duhet të mbrohem në disa aspekte, sepse nuk mund të mbrohen”, tha Spalletti.

Top Channel