Durrës e Igumenicë, sekuestrohen 300 kg kanabis

Sasia e drogës ishte fshehur në pjesë të ndryshme të një autobusi i cili po kryente procedurat e imbarkimit në një nga tragetet e linjës Durrës-Bari. Burime nga policia portuale bënë të ditur se janë afërsisht 100 kilogram lëndë narkotike e llojit kanabis sativa, e cila ishte vendosur në pako të ndryshme dhe kishte si destinacion shtetin fqinj, Italinë.

Drejtoria e policisë së qarkut Durrës dhe Drejtoria Rajonale e Kufirit dhe Migracionit nuk kanë dhënë asnjë deklaratë zyrtare lidhur me rastin. Ndërkohë burimet bëjnë të ditur se sasia e drogës u sekuestrua në autobuzin me targa të Tiranës 3478 G që drejtohej nga shtetasi Ermir Skardileva me banim në Tiranë i cili është ndaluar nga autoritetet policore.

Ndërkohë mbi mjetin do të vazhdojë kontrolli i imtësishëm pasi dyshohet që në pjesë të tjera të tij të jenë fshehur pako të tjera me lëndë narkotike. Vitin e fundit nuk kanë munguar rastet kur sasi të konsiderueshme marijuane që vinin nga Shqipëria janë bllokuar nga rojet financiare italiane. Pavarësisht deklarimeve për ujëra të sigurta nga trafiqet e paligjshme, trafikantët arrijnë të gjejnë rrugët për të vijuar aktivitetin e tyre.

Greqi, sekuestrohet 200 kg kanabis

Policia greke e Igumenicës tha se ka shkatërruar një grup trafikantësh të lëndëve narkotike që kishin ngritur rrjetin e tyre në Europën Perëndimore.

Sipas Zerit te Amerikes, hashashi me prejardhje nga Shqipëria transportohej drejt Suedisë me makina tregtare që eksportonin djathin grek. Autoritetet kane sekuestruar 200 kg hashash, nje arsenal armesh, ndersa kane vene ne pranga 3 persona.

Sipas policisë greke lënda narkotike pasi transportohej nga Shqipëria maskohej në podhimin blektoral që eksportohej drejt Stokholmit, ndersa paketimi realizohej në mënyrë të tilla duke mos ngjallur dyshime në kontrollet kufitare. Ndërkaq, policia e Igumenicës publikoi të dhënat për trafikun e lëndëve narkotike me prejardhje nga Shqipëria drejt Greqisë gjatë gjithë këtij viti.

Sipas të dhënave, policia ka arritur të  bllokojë mbi 4 tonë bimë narkotike hashashi të futur në Greqi nga territori shqiptar. Ne nje vit jane regjistruar  227  operacione kundër narkotikëve, ndersa 333 persona janë arrestuar për këto vepër kriminale. Të dhënat e publikuara flasin për një rritje të këtij trafiku që po bëhet gjithnjë e më shqetësues për policitë  shqiptare dhe greke në brezin kufitar mes të dy vendeve.

Top Channel