Lufta me Iranin riformatoi ekuilibrat e pushtetit përtej Gjirit Persik, analiza nga DW: Kush fitoi dhe kush humbi influencë 10/04 10:27
Tensioni midis Kolumbisë dhe Ekuadorit është përhapur edhe në tregti, teksa ky i fundit po kërcënon të rrisë tarifat doganore për produktet e importuara nga Bogotá nga 50% në 100% muajin e ardhshëm.
Presidenti kolumbian Gustavo Petro e përshkroi kërcënimin si “monstruoz” dhe tha se në shenjë hakmarrjeje, vendi i tij do të largohej nga Komuniteti Ekonomik i Andeve, i cili përfshin Ekuadorin, Bolivinë dhe Perunë.
“Ky është thjesht një monstruozitet” që “sinjalizon fundin e Pacto Andino për Kolumbinë, ne nuk kemi më vend atje”, theksoi presidenti social demokrat nëpërmjet X.
Vendimi i Ekuadorit për të rritur tarifat nga maji pasoi konstatimin se Bogotá nuk po zbatonte “masa të forta dhe efektive të sigurisë kufitare”, tha Ministria e Prodhimit, Tregtisë Ndërkombëtare dhe Investimeve e Ekuadorit në një deklaratë.
Tensionet vazhdojnë të përshkallëzohen midis qeverive. Në fund të shkurtit, qeveria e Presidentit të Ekuadorit Daniel Noboa akuzoi qeverinë e Petros se nuk po lufton siç duhet krimin e organizuar.
Ekuadori vendosi tarifa prej 30% për dhjetëra produkte kolumbiane, një masë që u miratua nga Presidenti Noboa, një aleat i Presidentit të SHBA-së Donald Trump dhe një kritik i ashpër i homologut të tij Petro.
Tarifat u rritën më pas nga 30% në 50% në mars, teksa qeveria ekuadoriane tha se ishte një masë e nevojshme për të siguruar 400 milionë dollarë për të investuar në monitorimin e kufirit të dy vendeve, i cili është rreth 600 kilometra i gjatë.
Zona kufitare është shtëpia e organizatave kriminale që janë kryesisht të përfshira në trafikun e drogës, minierat e paligjshme, veçanërisht minierat e arit, dhe trafikimin e emigrantëve të parregullt.
Kolumbia u hakmor duke vendosur tarifa prej 50% për produktet ekuadoriane dhe duke ndaluar eksportet e energjisë në vendin fqinj, i cili ishte përballur me ndërprerje të energjisë deri në 14 orë në ditë që nga viti 2024, kryesisht për shkak të një thatësire shumëvjeçare.
Të mërkurën, Ekuadori thirri ambasadorin e tij në Bogotá për konsultime.
Top Channel
