SHBA-ja dhe Irani marrin propozim paqeje, Trump premton ‘ferr’ nëse Ngushtica mbetet e mbyllur 06/04 10:56
Zhvillimet rreth skandalit të përvetësimit dhe menaxhimit të paligjshëm të subvencioneve bujqësore të BE-së në Greqi po krijojnë një nga momentet më të vështira për qeverinë Mitsotakis, ndërsa dosjet e Prokurorisë Evropiane që kanë mbërritur në Parlament përfshijnë deputetë dhe ish-ministra të partisë në fuqi, Demokracia e Re.
Me një mesazh të ri televiziv, sot në mëngjes kryeministri Kyriakos Mitsotakis u përpoq të tregojë se qeveria nuk do të mbulojë askënd dhe se është e gatshme të përballet me atë që e quajti lufta kundër “shtetit paralel” dhe klientelizmit që ka shoqëruar për dekada jetën politike greke. Ai theksoi se kërkon që, menjëherë pas heqjes së imunitetit parlamentar, të nisë procedura hetimore për deputetët që përmenden në dosje, në mënyrë që të sqarohet sa më shpejt nëse ka përgjegjësi penale.
Në të njëjtën kohë, Mitsotakis propozoi edhe ndryshime institucionale pas zgjedhjeve të vitit 2027, me më kryesoren ndarjen e rolit të ministrit nga ai i deputetit. Sipas propozimit të tij, një ministër nuk do të jetë më njëkohësisht deputet, por do të zëvendësohet përkohësisht në Parlament nga kandidati i parë rezervë i zonës së tij. Kryeministri argumenton se kjo do të forcojë rolin e deputetit dhe do të kufizojë marrëdhëniet klienteliste.
Megjithatë, opozita e konsideron mesazhin e Mitsotakis të pamjaftueshëm. PASOK-u flet për “qeveri të të pandehurve” dhe kërkon zgjedhje të menjëhershme, duke lidhur skandalin e OPEKEPE-së me çështjen e përgjimeve. Edhe partitë e tjera flasin për një sistem të organizuar korrupsioni dhe për një qeveri që, sipas tyre, ka humbur legjitimitetin politik.
Në prapaskenë po shtohen edhe zërat për zgjedhje të parakohshme. Disa në kampin qeveritar vlerësojnë se më mirë të shkohet në zgjedhje sa kohë Demokracia e Re ruan ende epërsinë. Por zyra kryeministrore nuk duket e gatshme të marrë këtë risk, pasi dosje të reja mund të mbërrijnë në Parlament edhe në muajt e ardhshëm, duke mbajtur hapur skandalin për një kohë të gjatë.
Për momentin, skenari më i mundshëm mbetet që qeveria të përpiqet të fitojë kohë, të kalojë krizën dhe të shkojë drejt zgjedhjeve të rregullta të vitit 2027. Por, nëse presioni politik dhe zbulimet e reja vazhdojnë, askush nuk mund të përjashtojë plotësisht mundësinë e zgjedhjeve të parakohshme.
Top Channel
