“Mungesën e një strategjie të qartë afatgjatë”/ Analiza e BBC: Trump po bën luftë bazuar në instinkt, kjo nuk po funksionon

BBC ka në analizën e saj për këtë situatë shkruan se SHBA-ja që pritej si një ndërhyrje e shpejtë dhe me rezultat të menjëhershëm, e mbështetur edhe nga kryeministri izraelit Benjamin Netanyahu, është shndërruar në një përballje shumë më komplekse, ku Irani ka treguar rezistencë të fortë dhe aftësi për të kundërpërgjigjur.

Pavarësisht goditjes së rëndë fillestare, ku u vra lideri suprem Ali Khamenei dhe figura të tjera kyçe të regjimit, struktura shtetërore iraniane nuk është shembur.

Përkundrazi, Teherani ka arritur të ruajë funksionalitetin dhe të kalojë në një strategji të zgjerimit të konfliktit, duke goditur objektiva në rajon dhe duke rritur presionin mbi interesat amerikane dhe aleatët e tyre.

Një nga lëvizjet më të rëndësishme ka qenë ndërhyrja në Strait of Hormuz, një nga arteriet më të rëndësishme të furnizimit global me naftë, çka ka shkaktuar tronditje në tregjet ndërkombëtare dhe ka rritur ndjeshëm rrezikun për krizë ekonomike globale.

Zhvillimet në terren kanë nxjerrë në pah edhe një problem thelbësor në qasjen amerikane ndaj konfliktit: mungesën e një strategjie të qartë afatgjatë.

Ndërsa figura historike si Dwight D. Eisenhower kanë theksuar rëndësinë e planifikimit në kohë lufte, administrata aktuale duket se është mbështetur më shumë në intuitë dhe vendimmarrje të shpejtë.

Vetë Trump ka sugjeruar se përfundimi i luftës do të vijë “kur ta ndiej”, një deklaratë që për shumë analistë reflekton mungesë koherence strategjike në një konflikt kaq të ndërlikuar.

Nga ana tjetër, Netanyahu ka artikuluar më qartë objektivat e Izraelit, duke e konsideruar këtë luftë si thelbësore për sigurinë dhe të ardhmen e vendit të tij.

Ai e sheh dobësimin e Iranit si një qëllim afatgjatë strategjik dhe bashkëpunimin me SHBA-në si element kyç për arritjen e tij. Megjithatë, edhe brenda Izraelit ka pasur më parë skepticizëm nëse një luftë e tillë mund të prodhojë rezultate përfundimtare pa pasoja të mëdha.

Ndërkohë, konflikti po merr gjithnjë e më shumë tiparet e një lufte asimetrike, ku Irani, pavarësisht inferioritetit ushtarak, po shfrytëzon avantazhet e tij gjeografike dhe rrjetin e aleatëve për të balancuar fuqinë e kundërshtarëve.

Përveç Hormuzit, tensionet mund të përhapen edhe në pika të tjera kritike si Bab al-Mandab, duke rrezikuar seriozisht rrugët kryesore të tregtisë globale dhe duke shtuar presionin mbi ekonominë botërore.

Përpjekjet për negociata janë ende të brishta dhe të paqarta. Ndërmjetësime të ndryshme janë në zhvillim, por qëndrimet e palëve mbeten larg kompromisit.

Draftet e planeve të paqes sugjerojnë kërkesa të forta nga SHBA dhe Izraeli, ndërsa Irani kërkon garanci sigurie, njohje të rolit të tij në rajon dhe kompensime për dëmet e luftës. Në këtë klimë, një marrëveshje duket e vështirë, edhe pse jo e pamundur.

Në mungesë të një zgjidhjeje diplomatike, Trump përballet me dy skenarë kryesorë: të shpallë një fitore të njëanshme, duke rrezikuar destabilizim të mëtejshëm, ose të përshkallëzojë konfliktin me angazhim më të madh ushtarak.

Opsioni i dytë mbart rrezikun e një lufte të gjatë dhe rraskapitëse, ku Irani mund të përdorë strategjinë e konsumimit për të dobësuar kundërshtarin.

Ekspertët paralajmërojnë se ky konflikt mund të shndërrohet në një pikë kthese historike, të krahasueshme me Suez Crisis, duke ndikuar në balancat globale të fuqisë.

Nëse situata përshkallëzohet më tej, pasojat mund të jenë të thella jo vetëm për Lindjen e Mesme, por edhe për rendin ndërkombëtar në tërësi.

Top Channel