Sulmohet anija iraniane pranë brigjeve të Sri Lankës, 140 persona të zhduku 04/03 13:15
Rusia ka akuzuar Shtetet e Bashkuara se kanë përdorur një kërcënim fiktiv nga Irani si pretekst për të përmbysur rendin kushtetues në vend dhe tha se thirrja e Uashingtonit që iranianët të marrin pushtetin nga udhëheqësit e tyre ishte cinike dhe çnjerëzore.
Zëdhënësja e Ministrisë së Jashtme ruse, Maria Zakharova tha se Shtetet e Bashkuara kishin përdorur negociatat me Iranin, të cilat ishin duke u zhvilluar deri javën e kaluar, si mbulesë për një plan ndryshimi regjimi në Teheran.
Rusia ka një marrëveshje partneriteti strategjik me Iranin dhe Presidenti Vladimir Putin ka dënuar atë që e quajti “vrasje cinike” e Udhëheqësit Suprem Ajatollah Ali Khamenei, i cili u vra në ditën e parë të luftës së nisur nga Shtetet e Bashkuara dhe Izraeli të shtunën.
“Nuk ka dyshim se kërcënimi imagjinar dhe i sajuar iranian, i cili është shprehur vazhdimisht për shumë vite, ishte thjesht një pretekst për zbatimin e një plani për të përmbysur me dhunë rendin kushtetues të një shteti sovran… të cilin Uashingtoni dhe Tel Avivi nuk e pëlqejnë”, u tha Zakharova gazetarëve.
Pa e përmendur Presidentin e SHBA-së Donald Trump me emër, Zakharova komentoi thirrjen e tij që iranianët të marrin pushtetin nga udhëheqja fetare.
“Është edhe më cinike dhe çnjerëzore të dëgjosh një thirrje që iranianët të marrin pushtetin, siç thotë Perëndimi, kur vetë Perëndimi në thelb po ua shkul nga duart iranianëve”, tha ajo.
Top Channel
