Mijëra pasagjerë të kroçerave të bllokuar në Gjirin Persik, personazhe të njohur rrëfejnë tmerrin në Dubai pas përshkallëzimit të konfliktit

Pasagjerët dhe ekuipazhet nuk lejohen të zbarkojnë, ndërsa anijet janë shndërruar në “hotele lundruese”, për shkak të përshkallëzimit të armiqësive dhe frikës për sigurinë në një nga korridoret më të rëndësishme të transportit detar në botë. Situata u tensionua pasi Irani u zotua të sillte kaos, duke paralajmëruar se do të mbyllte ngushticën dhe do të “djegte çdo anije” që do të përpiqej të kalonte.

Sipas raportimeve, të paktën gjashtë anije të kompanive të mëdha turistike ndodhen aktualisht në ndalesë dhe presin udhëzime për nisje.

Ndërkohë, rreth 130 mijë shtetas britanikë janë regjistruar si të bllokuar në rajon, ndërsa linjat ajrore kanë nisur të shtojnë fluturimet nga Emiratet e Bashkuara Arabe. Qeveria britanike po organizon gjithashtu fluturimin e parë për evakuim emergjent. Duke folur për gazetën gjermane Bild, një pasagjer përshkroi situatën si tejet të tensionuar: “Shumë pasagjerë, përfshirë familje me fëmijë, po fillojnë të humbasin qetësinë. Askush nuk e di se si ose kur do të dalim nga këtu.” Sipas tij, në bord mbizotëron një atmosferë “paniku, lotësh” dhe “frike nga përshkallëzime të mëtejshme”.

Shqetësimet po shtohen edhe për kohëzgjatjen e bllokimit dhe përballimin e shërbimeve bazë në anije, si furnizimi me ushqim dhe ujë, nëse situata zgjatet.

Pasagjerët e kroçerave janë vetëm të fundit në një listë të gjatë udhëtarësh të bllokuar në rajon. Turistë të tjerë dhe influencues që ndodhen në Dubai kanë ndarë përditësime në rrjetet sociale, pasi u përfshinë në kaosin e krijuar nga sulmet ajrore dhe tensionet në rritje në zonë.

“Netët më të frikshme dhe më të këqija të jetës sonë” – kështu e përshkruajnë shumë prej të bllokuarve situatën në Dubai, ndërsa shpërthime të vazhdueshme dhe interceptime raketash kanë ndriçuar qiellin mbi qytet, në mes të tensioneve në rritje në rajon.

Pasagjeri i kroçerës Darren Lee, nga Mançesteri, i cili ndodhet i bllokuar me familjen e tij në anijen MSC Euribia, i tha Daily Mail se anija ishte e rrethuar nga “bume” të fuqishme. Ai udhëton me partnerin, djalin 12-vjeçar dhe vajzën 19-vjeçare.

“Kishim dëgjuar disa shpërthime, për të cilat na është thënë se ishin përgjime raketash dhe dronësh. Një dron u kap pikërisht mbi kokat tona dhe pati një bum vërtet të fuqishëm, gjë që i bëri të gjithë të vraponin brenda”, tha Lee.

Ai shtoi se shqetësimi i tij më i madh nuk është lufta, por pamundësia për t’u kthyer në shtëpi: “E kërkova në Google dhe Emirates, mendoj, ka 5,000 fluturime në ditë, dhe nuk kanë fluturuar për tre ose katër ditë, kështu që do të ketë një numër të madh fluturimesh të prapambetura. Kjo gjë po fillon të më godasë tani, por gjithmonë jam përpjekur të jem një person pozitiv.”

Anije të bllokuara dhe protokolle emergjence

Sipas portalit të udhëtimeve Hosteltur.com, kompanitë më të prekura janë MSC Cruises dhe Celestyal Cruises. MSC Euribia mbetet e ankoruar në portin e Dubait nën masa të rrepta sigurie, me pezullimin e ngarkimit deri në njoftim të mëtejshëm.

Anijet Celestyal Journey dhe Celestyal Discovery kanë anuluar nisjet dhe mbahen nën mbikëqyrje në portet rajonale. Aktivizimi i protokolleve të emergjencës ka detyruar kapitenët të pezullojnë itineraret për shkak të rrezikut në Ngushtica e Hormuzit dhe rritjes së ndjeshme të kostove të sigurimit, ku në disa raste është pezulluar edhe mbulimi i operacioneve në zonë.

“Ky imobilizim i detyruar nuk është vetëm një problem logjistik, por një çështje sigurie që ka hyrë në territorin e një krize operacionale në shkallë të gjerë”, theksoi Hosteltur.com.

Industria e kroçerave, në kulmin e sezonit dimëror, po përballet me një paralizë teknike që shkon përtej anulimit të thjeshtë të itinerareve. Kompanitë po presin krijimin e korridoreve të sigurta për evakuimin ose ripozicionimin e flotave në ujëra më pak të rrezikshme.

Një zëdhënës i Celestyal Cruises deklaroi se, në përputhje me udhëzimet e autoriteteve lokale, aktualisht nuk lejohet zbarkimi i mysafirëve. “Do të fillojmë zbarkimin në Dubai sapo të jepet leja dhe do të ofrojmë mbështetje për transferimin drejt Aeroportit të Abu Dhabit. Mysafirëve do t’u ofrohet rimbursim i plotë ose kredit për udhëtime të ardhshme”, tha ai.

Ndërkohë, një zëdhënës i MSC tha se kompania po ndjek udhëzimet e autoriteteve ushtarake rajonale amerikane për ta mbajtur anijen në port, ndërsa hapësira ajrore mbetet e mbyllur. “Situata në bord është e qetë dhe mysafirët janë të mirëmbajtur”, shtoi ai.

Rrëfime nga terreni: “Flemë në bodrum me fëmijët”

Një re tymi u pa duke u ngritur nga porti i Jebel Ali pas një sulmi të raportuar, ndërsa hotelet u evakuuan dhe aeroportet u përfshinë nga konfuzioni për shkak të anulimeve të papritura.

Mes atyre që ndanë përjetimet e tyre ishin edhe personazhe të njohur. Ish-ylli i “Love Island”, Laura Anderson, 36 vjeç, zbuloi se arriti të sigurojë një fluturim nga Emiratet e Bashkuara Arabe drejt Edinburgut me vajzën e saj dyvjeçare, duke u lutur për “qiell të sigurt”.

Ndërkohë, ish-ylli i “TOWIE”, Kate Ferdinand, dhe ish-kandidatja e “The Apprentice”, Luisa Zissman, treguan se kishin fjetur në bodrumet e shtëpive të tyre në Dubai me fëmijët, ndërsa raketat interceptoheshin mbi qytet.

Kate Ferdinand shkroi në Instagram: “Faleminderit për të gjitha mesazhet. Jemi të sigurt. Qeveria po bën një punë të mrekullueshme për të na mbajtur kështu dhe, pavarësisht nervozizmit tim, ndiej se jemi në duar të sigurta.”

Situata mbetet e tensionuar, ndërsa mijëra pasagjerë dhe banorë presin zhvillimet e radhës, mes pasigurive për hapjen e hapësirës ajrore dhe rifillimin e lëvizjes detare në rajon.

Duke ndarë një foto të avionit para ngritjes, ish-ylli i “Love Island”, Laura Anderson, shkroi: “Jemi nisur. Edhe pse po e marr çdo fazë shumë lehtë… Aeroporti ishte i qetë siç pritej. Njerëzit ishin aq të dobishëm sa ndjeva pak trishtim.” Ajo arriti të largohej nga rajoni mes përshkallëzimit të konfliktit në Lindjen e Mesme.

Ndërkohë, gjyshja Mina Pattni, 62 vjeçe nga Leicesteri, tregoi momentet e frikshme që përjetoi familja e saj në hotelin Fairmont The Palm në Palm Jumeirah, i cili u godit nga një dron ose nga mbeturina që shkaktuan zjarr.

“Ishte absolutisht e tmerrshme,” tha Mina. “Ne ishim ulur për të ngrënë të shtunën në mbrëmje kur dëgjuam zhurmë dronësh ose raketash në ajër. Kjo ishte mjaft e frikshme, por pikërisht kur porositëm, pati një shpërthim të tmerrshëm dhe pamë që ana e ndërtesës ishte goditur. Të gjithë u evakuuam derisa zjarri u shua.”

Mina po udhëtonte me bashkëshortin e saj Latash, 67 vjeç, vajzën dhe dhëndrin, si dhe dy nipërit, Krishin dy vjeç dhe Rohinin pesë muajsh. “Fëmijët ishin shumë të frikësuar. Ata e ndjenë panikun, megjithëse stafi i hotelit ishte shumë i mirë dhe arriti të shërbente ushqim të mirë, edhe pse gazi ishte fikur,” shtoi ajo.

Pritje të gjata dhe mungesë informacioni

James Dixon, 18 vjeç, dhe babai i tij Jim Dixon, 61 vjeç nga Leicesteri, duhej të fluturonin për në Mbretërinë e Bashkuar të shtunën pasdite. Pas regjistrimit, ata u mbajtën për pesë orë në aeroport përpara se të transferoheshin në hotel.

“Komunikimi nuk ka qenë i shkëlqyer, për të qenë i sinqertë,” tha Jim. “Kemi pasur më shumë informacion nga njerëz në vendlindje, por e kuptoj që është një situatë e jashtëzakonshme.”

Kontabilistët John Barndell, 37 vjeç nga Londra, dhe Greg Coull, 35 vjeç nga Edinburgu, po ktheheshin nga një udhëtim pune në Indi dhe ishin në tranzit në Dubai vetëm për ndërrim fluturimi. “Linja ajrore dhe hoteli u kujdesën mirë për ne, megjithëse komunikimi mund të kishte qenë më i mirë. Ne thjesht duam të marrim çdo fluturim për në Evropë do të shkojmë kudo,” tha John.

Fluturime shtesë dhe evakuim emergjent

Kriza ka lënë rreth 130 mijë shtetas britanikë të regjistruar si të bllokuar në Gjirin Persik. Qeveria britanike ka planifikuar fluturimin e parë të riatdhesimit nga Aeroporti Ndërkombëtar i Muscatit në orën 23:00 sipas kohës lokale, duke i dhënë përparësi personave më të cenueshëm.

Shtetasit britanikë, bashkëshortët/partnerët dhe fëmijët nën 18 vjeç me dokumente të vlefshme udhëtimi janë të kualifikuar për këtë fluturim. Ministria e Jashtme e Mbretërisë së Bashkuar njoftoi se do të kontaktojë qytetarët për të organizuar largimin dhe u bëri thirrje të mos paraqiten në aeroport pa u njoftuar zyrtarisht.

Ndërkohë, linjat ajrore po shtojnë kapacitetet. Emirates operon shtatë fluturime nga Dubai drejt Mbretërisë së Bashkuar, Etihad Airways ka dy nisje nga Abu Dhabi, ndërsa Virgin Atlantic do të kryejë një fluturim nga Dubai drejt Londrës Heathrow. Rreth 100 pilotë dhe anëtarë ekuipazhi nga British Airways dhe kompani të tjera u transportuan nga Muscati drejt Heathrow.

Më shumë se 11 mijë fluturime komerciale janë anuluar, duke prekur rreth një milion persona, pasi hapësira ajrore mbi Gjirin Persik është mbyllur kryesisht.

Situata mbetet e tensionuar, ndërsa mijëra turistë dhe banorë presin zhvillimet e radhës, mes frikës, pasigurisë dhe përpjekjeve për t’u kthyer në shtëpi.

Top Channel