Trump nuk përjashton mundësinë e dërgimit të trupave amerikane në Iran: Do të jenë atje nëse është e nevojshme 02/03 17:33
Presidenti Trump po vihet nën presion në rritje për t’i shpjeguar popullit amerikan fushatën e tij ushtarake në Iran.
Deri më tani, presidenti nuk ka mbajtur një fjalim dhe as një konferencë për shtyp. Ai injoroi pyetjet e drejtuara nga gazetarët ndërsa udhëtonte nga Florida për në Uashington të dielën.
“Videot e regjistruara paraprakisht në mediat sociale nuk mjaftojnë”, vërejti senatori demokrat Chris Coons .
Por Trump po komunikon sipas kushteve të tij shkruan CNN në mënyra që nuk ekzistonin as për presidentët e mëparshëm në kohë lufte. Ai po poston përditësime në platformën e mediave sociale që ai vetë kontrollon, po bisedon me gazetarët që i telefonojnë në celular, si dhe po ndan linqe për opinionet që i mbështet.
Trump ka projektuar forcë, por ka dërguar edhe mesazhe të përziera në lidhje me objektivat e sulmeve ushtarake. The New York Times, pas një interviste të shkurtër telefonike me Trump, tha se ai ofroi “disa vizione në dukje kontradiktore” në lidhje me një tranzicion të pushtetit në Iran.
Më parë, kur Trump foli me një gazetar të Axios të shtunën, ai tha se fushata ushtarake mund të mos zgjasë shumë: “Mund të zgjas shumë dhe të marr përsipër të gjithën, ose ta përfundoj brenda dy ose tre ditësh.”
Pastaj, të dielën, ai i tha Daily Mail se “gjithmonë ka qenë një proces katër-javor” dhe i tha The Times se “kishim ndërmend katër deri në pesë javë” për sulmet e përbashkëta SHBA-Izrael në Iran.
Në një telefonatë tjetër, këtë herë me gazetarë nga MS NOW, Trump tregoi se kishte ndjekur mbulimin e lajmeve të operacioneve luftarake. Ai tha se kishte parë “festime” të vdekjes së Ajatollah Ali Khameneit si brenda Iranit ashtu edhe në rrugët e Los Angeles.
Ajo telefonatë, tha MS NOW, zgjati më pak se një minutë. Ajo pasqyron “qasjen e shpërndarë” të Trump ndaj komunikimit rreth konfliktit, një postim në Truth Social këtu, një telefonatë atje, shton CNN.
“Nuk ka komunikues më të mirë se presidenti ynë”, tha Sekretari i Mbrojtjes Pete Hegseth në një konferencë për shtyp të hënën në mëngjes.
Gjatë fundjavës së parë të luftimeve, mesazhet kryesore të Trump erdhën nëpërmjet dy videove në internet të regjistruara dhe të publikuara nga Shtëpia e Bardhë. Disa kritikë e kanë akuzuar administratën Trump se nuk ka arritur të argumentojë për luftën.
Top Channel
