Nga kryeministri i Shqipërisë, Edi Rama, te Presidentja e Kosovës, Vjosa Osmani, dhe udhëheqësit e 25 vendeve të tjera të botës u ulën këtë të enjte në tryezën e Bordit të Paqes, në ceremoninë historike, nën drejtimin e Presidentit të Shteteve të Bashkuara të Amerikës, Donald Trump.
“Nuk ka asgjë më të kushtueshme se paqja”, tha kreu i Shtëpisë së Bardhë para 27 anëtarëve të Bordit të Paqes, teksa zbuloi se Shqipëria e Kosova do të kontribuojnë me trupa ushtarake në Gaza, dhe jo me shumën prej 1 miliard dollarësh.
“Kombet që janë këtu sot, nuk do të mbledhin thjesht para, por disa do të dërgojnë persona për të mbikëqyrur dhe siguruar një paqe të sigurt në Gaza. Shqipëria, Kosova, Kazakistani kanë premtuar trupa dhe polici në Gaza. Të gjitha këto vende po punojnë për një vizion që ka të bëjë me paqen në Lindjen e Mesme”, tha Trump.
Në mesazhin e tij të parë në Bordin e Paqes, Presidenti Trump tha se Shtetet e Bashkuara do të kontribuojnë me 10 miliardë dollarë në këtë organizëm ndërkombëtar, të krijuar prej tij, me qëllimin madhor për të rikthyer paqen në Lindjen e Mesme.
Trump shtoi: “Azerbajxhani, Maroku, Emiratet e Bashkuara Arabe, Katari, Arabia Saudite e disa aleatë të tjerë kanë premtuar në total më shumë se 7 miliardë dollarë për rindërtimin e Rripit të Gazës pas luftës. Vetë Shtetet e Bashkuara të Amerikës do të japin 10 miliardë dollarë të tjera për rimëkëmbjen e territorit palestinez. Japonia ka premtuar që do të organizojë për të mbledhur fonde, Kina do të jetë e përfshirë, mendoj që edhe Rusia do të jetë dakord. FIFA do të ndihmojë për të mbledhur 77 miliardë euro për Gazën”.
Vlerësime e falënderime për vendet që iu bashkuan Bordit të Paqes, por edhe paralajmërime e kërcënime! Mesazhet e Presidentit Donald Trump ishin të qarta. Ai e nisi me Kosovën dhe Serbinë, teksa ju drejtua me një mesazh të drejtpërdrejtë Presidentes Vjosa Osmani, e pranishme në tryezë.
“Kosova dhe Serbia keni bërë një punë të jashtëzakonshme. Nëse nuk shkoni mirë, më merrni në telefon dhe do ta zgjidhim. Presidentja Vjosa Osmani po bën një punë shumë të mirë”, shtoi Presidenti i SHBA.
Nuk mungoi një mesazh i Presidentit Trump dhe për vendet që refuzuan ftesën e tij për t’iu bashkuar Bordit të Paqes: “Besoj se është bordi më i rëndësishëm, për sa i përket fuqisë dhe prestigjit. Pothuajse të gjithë e kanë pranuar, dhe ata që nuk e kanë bërë, do ta bëjnë. Disa po përpiqen të bëjnë pak si të zgjuar – por kjo nuk funksionon, nuk mund të bëni të zgjuarin me mua”.
I prerë ishte Donald Trump me Iranin dhe Hamasin, të cilëve ju drejtua me një paralajmërim për armët: “Kemi punë për të bërë ende me Iranin, nuk mund t’i lejojmë të kenë armë bërthamore. Nuk mund të ketë paqe në Lindjen e Mesme, sa kohë Irani ka bombën bërthamore. Nuk duhet të bëjnë destabilitet në rajon. Nëse nuk arrihet marrëveshja, gjëra shumë të këqija do të ndodhin. Hamasi do t’i dorëzojë armët dhe nëse nuk e bëjnë do të përballen me pasoja”.
Në Bordin e Paqes dhanë mesazhe edhe Sekretari Amerikan i Shtetit, Marco Rubio, dhëndri i Trump, Jared Kushner, dhe i dërguari special i presidentit amerikan, Steve Witkoff, të tre pjesë e bordit ekzekutiv, të cilët vlerësuan rolin që do të ketë ky organizëm për paqen në botë.
Bordi i Paqes, me 27 anëtarë, u themelua më 22 janar në Davos të Zvicrës, në prezencë të presidentit Trump. Këshilli i Sigurimit i Kombeve të Bashkuara e ka autorizuar këtë trup që të mbikëqyrë zbatimin e armëpushimit në Gazë dhe të angazhohet në aspektin e qeverisjes dhe rindërtimit.
Shqipëria, e përfaqësuar nga kryeministri Edi Rama, mori sot pjesë në takimin inaugurues të Bordit të Paqes, me ftesë nga presidenti i Shteteve të Bashkuara të Amerikës. Sikurse duket në fotot e shkrepura pas takimit, kryeministri Edi Rama, pas përfundimit të takimit, u përshëndet me presidentin e SHBA Donald Trump, ndërsa bisedës së tyre iu bashkua edhe presidentja e Kosovës Vjosa Osmani.
17:57 Foto/ Mbyllet takimi inaugurues i Bordit të Paqes, Rama dhe Osmani bisedojnë me Presidentin Trump
Takimi inaugurues i Bordit të Paqes në Uashington është mbyllur.
Në Uashington është mbajtur takimi inaugurues i Bordit të Paqes, ku përveç shteteve bashkë-themeluese, mori pjesë edhe FIFA. Presidenti i organit më të lartë të futbollit në botë, Gianni Infantino, mori fjalën e tij në takimin e bordit. Ai u shpreh se SHBA do të bashkojë botën në verë, ku iu referua Botërorit 2026 dhe gjithashtu, u ndal te investimet që FIFA do të bëjë për rindërtimin e Gazës.
Në fjalën e tij në Bordin e Paqes, Kryeministri Edi Rama u ndal edhe te gjyqi i ish-krerëve të UÇK-së në Hagë. Ai iu drejtua Presidentit të SHBA-së, Donald Trump, duke i thënë se ish-krerët e UÇK-së, përfshirë ish-presidentin e Kosovës, Hashim Thaçi, po mbahen në një gjyq prej 6 vitesh, duke kritikuar drejtësinë europiane, që sipas tij është sponsorizuar nga disa vende prezente në Bordin e Paqes dhe që duhet t’i vijë turp.
Teksa falenderoi Presidentin Trump për ftesën që i bëri Shqipërisë si një nga vendet anëtare në Bordin e Paqes, kryeministri Rama tha se “në Europë thonë që Bordi i Paqes synon të zëvendësojë OKB-në, por nuk më duket një përpjekje e tillë”. “Faleminderit që më ftuat, z. President. Vota e harmonizuar dypartiake që Parlamenti ynë flet vetë sa e nderuar është Shqipëra. Në Europë thonë që Bordi i Paqes synon të zëvendësojë OKB-në, por nuk më duket një përpjekje e tillë. Zoti e bekoftë Bordin e Paqes.
Në Uashington po mbahet takimi inaugurues i Bordit të Paqes, ku prezente janë edhe Shqipëria me Kosovën. Në fjalën e tij, gjenerali i lartë amerikan, Jasper Jeffers III, foli për planin ushtarak që do të përdoret në terrenin e Gazës. Ai tha se mes pesë vendeve të para që do të angazhonin trupa ushtarakë në terren ishin edhe Shqipëria me Kosovën.
Presidenti i SHBA-së, Donald Trump, ka mbledhur Bordin e parë të Paqes në Uashington. Në fjalën e tij, ai u shpreh se në këtë Bord është bashkuar edhe FIFA, që sipas tij, ka mbledhur miliarda dollarë për një projekt në Gaza.
Trump ka ndarë një mesazh gjatë fjalës së tij në Uashington, ku u shpreh se SHBA do të akordojë 10 miliardë dollarë për Bordin e Paqes.
16:19 Bordi i Paqes, Donald Trump: Shqipëria dhe Kosova do të angazhohen me trupa në Gaza
“Dua të falënderoj Indonezinë. Një vend i mrekullueshëm. Maroku do të angazhohet. Shqipëria dhe Kosova do të kenë gjithashtu trupa në terren”, tha Trump.
Donald Trump është shprehur se: Hamasi më ka premtuar se do të heqë dorë nga armët. Në këto momente Gaza nuk është një vend terrorist. Jam i kënaqur të them se disa vende kanë kontribuar me më shumë se 7 miliardë dollarë. Faleminderit, djema. Çdo dollar i shpenzuar është investim për stabilitetin që është kaq i rëndësishëm. Janë njerëz të zgjuar, ndonjëherë shumë energjikë, por njerëz të mrekullueshëm. Bota po pret për Hamasin dhe kjo do të ndodhë. Kemi Libanin me disa probleme, për të cilat po punojmë. Më e rëndësishmja është t’i japim fund programit bërthamor të Iranit. Shumë në Europë dëshirojnë të jenë anëtarë të përhershëm. Kemi marrëdhënie shumë të mira me Europën, kemi kreun e NATO-s që po bën një punë të shkëlqyer. Unë kujdesem që të shpëtoj jetë njerëzish, nuk dua që njerëzit të vriten edhe pse janë vende shumë larg SHBA-së.
Donald Trump është shprehur se: Herën e fundit që isha në Kinë, presidenti atje më trajtoi shumë mirë, më organizoi një mikpritje të jashtëzakonshme. Presidentit i thashë që herën tjetër që të vij në Kinë dua një mikpritje edhe më madhështore. Pastaj punësuam Kushnerin dhe ai është i dërguari i paqes. Duke qenë se Irani tani është një çështje e rëndësishme, kemi pasur bisedime me ta, ende nuk kemi arritur një marrëveshje. Duhet të kemi një marrëveshje, përndryshe do të ndodhin gjëra të këqija. Kosova–Serbia, keni bërë një punë të jashtëzakonshme. Nëse nuk shkoni mirë, më merrni në telefon dhe do ta zgjidhim.
Presidenti i Shteteve të Bashkuara të Amerikës, Donald Trump, ka përshëndetur kryeministrin e Shqipërisë Edi Ramën dhe presidenten e Kosovës Vjosa Osmanin, gjatë fjalimit të tij në Bordin e Paqes që po mbahet në Uashington.
Në një fjalim të mbajtur në Bordin e Paqes, ku i pranishëm ishte edhe kryeministri i Shqipërisë Edi Rama, Presidenti amerikan Donald Trump theksoi rëndësinë e bashkëpunimit ndërkombëtar për të garantuar një të ardhme më të mirë për popullin e Gazës.
15:42 Trump nis fjalimin në Bordin e Paqes: Disa liderë po bëjnë naze, disa të tjerë nuk i duam ne
Donald Trump është shprehur se: Sukseset që kemi arritur, në fillim më thanë që nuk realizoheshin për 4 vite, u arritën brenda një viti. Arritje financiare të jashtëzakonshme, kemi bërë një punë të mrekullueshme. Bordi i Paqes është një nga gjërat më të arritura. Disa nga luftërat zgjasin prej dhjetëra vitesh dhe ne i kemi dhënë fund brenda dy ditëve.
Gaza është çështje komplekse, Marco Rubio po na ndjek, çfarë pune e mrekullueshme është bërë. Sot është një nder i madh që ju mirëpres në Institutin e Paqes. Është bordi më i fuqishëm, këtu bën pjesë pjesa më e madhe e liderëve botërorë. Disa po bëjnë naze, por shumë drejtues e kanë pranuar menjëherë. Ka disa që nuk duam t’i kemi
15:17 Trump mbërrin në Bordin e Paqes, takohet me kryeministrin Edi Rama
Sapo ka nisur takimi inaugurues i Bordit të Paqes në Uashington. Takimi ka nisur me një foto familjare, ku të pranishëm janë kryeministri Edi Rama dhe presidentja e Kosovës, Vjosa Osmani. Ndërkohë sapo është bashkuar edhe presidenti i SHBA, Donald Trump.
Ministri i Shtetit për Pushtetin Vendor, Ervin Demo ka ndarë foton e kryeministrit Edi Rama, teksa ndodhet në automjet, rrugës për në Bordin e Paqes. Kryeministri Edi Rama do të përfaqësoje Shqipërinë në takimin e parë inagurues të Bordit të Paqes, ndërsa pritet të mbajë edhe një fjalim. “Krenar për Shqipërinë. Rrugës për në mbledhjen e Bordit të Paqes”-shkruan ministri Demo, në foton me Ramën nga Uashingtoni.
Mbledhja inauguruese e Bordit të Paqes të presidentit amerikan Donald Trump, iniciativa e tij për t’i dhënë fund luftës në Gaza, nis sot me përfaqësues nga më shumë se 45 vende që pritet të marrin pjesë.
Megjithatë, disa aleatë të mëdhenj evropianë, përfshirë Britaninë e Madhe, Gjermaninë dhe Francën, kanë refuzuar ftesat, duke shprehur dyshime për mënyrën e funksionimit të grupit dhe mundësinë që ai të rivalizojë Kombet e Bashkuara. Në bord nuk ka përfaqësim palestinez, ndërsa Izraeli mban një vend.
13:50 Bordi i Paqes në Uashington, zbardhet axhenda e takimit
Instituti Amerikan i Paqes “Donald J. Trump”
Në orën 12:15- Fillojnë mbërritjet e delegacioneve
Në orën 14:05- Përfundojnë mbërritjet e delegacioneve-
Në orën 14:40- Foto familjare
15:00- Fillon mbledhja
Fjalë mirëseardhjeje dhe hapëse nga Presidenti dhe Zëvendëspresidenti i Shteteve të Bashkuara. Prezantime në tryezë të rrumbullakët & Përditësime kryesore
1.Sekretari Rubio – Natyra historike e mbledhjes së BoP
2. Steve Witkoff – Suksesi në lirimin e pengjeve dhe koordinimi i ndërmjetësve
3. Ambasadori Mike Waltz – Ndihma dhe adresimi i nevojave aktuale të Gazës
4.Dr. Ali Shaath – NCAG, e ardhmja e Gazës
5. Nick Mladenov – OHR & Demilitarizimi
6. Gjeneral Major Jeffers – ISF & Policia e Gazës
7.Tony Blair – Ngritja e kapaciteteve & Zhvillimi organizativ
8. Yakir Gabay – Rindërtimi / Plani i Përgjithshëm (Master Plan)
9.Liran Tancman – Zinxhiri i furnizimit & Teknologjia
10.Marc Rowan – Fondi Sovran i Pasurisë
11.Presidenti i Bankës Botërore, Ajay Banga – Përgjegjësia fiskale / transparenca dhe Fondi Sovran
12.Jared Kushner – Rezultate të matshme të BoP në Gaza dhe ndikimi i ardhshëm i BoP
Video për rindërtimin e Gazës
Ndërhyrjet
Rendi:
1. Bahreini – Mbreti Hamad bin Isa Al Khalifa
2. Kazakistani – Presidenti Kassym-Jomart Tokayev
3. Uzbekistani – Presidenti Shavkat Mirziyoyev
4. Indonezia – Presidenti Praboëo Subianto
5. Rumania – Presidenti Nicușor Dan
6. Shqipëria – Kryeministri Edi Rama
7. Egjipti – Kryeministri Mostafa Madbouly
8. Katari – Kryeministri Mohammed Al-Thani
9. Emiratet e Bashkuara Arabe – Zëvendëskryeministër dhe Ministër i Punëve të Jashtme Sheikh Abdullah Bin Zayed Bin Sultan Al-Nahyan
10. Maroku – Ministri i Jashtëm Nasser Bourita
11. Turqia – Ministri i Jashtëm Hakan Fidan
12. Kuvajti – Ministri i Jashtëm Sheikh Jarrah Jaber Al-Ahmad Al-Sabah
13. Arabia Saudite – Ministri i Shtetit për Punët e Jashtme Adel Al-Aljub
Top Channel
