Sasia më e madhe e konfiskuar ndonjëherë, policia e Maqedonisë së Veriut sekuestron mbi 30 tonë kanabis 06/02 19:42
Norvegjia pritet të nisë një hetim mbi Ministrinë e saj të Jashtme lidhur me lidhjet me të ndjerin abuzues seksual amerikan, Jeffrey Epstein, duke u bërë një nga disa vendet evropiane që ndjejnë presionin nga një skandal që ende nuk ka pasur pasoja të mëdha politike në SHBA.
Publikimi i një sasie të madhe dokumentesh javën e kaluar ka zbuluar lidhje të reja të Epsteinit me politikanë, anëtarë të familjeve mbretërore dhe të pasur shumë të njohur.
Në Norvegji, figura publike si Princesha Mette-Marit dhe ish-kryeministri dhe ish-ministri i Jashtëm Thorbjoern Jagland janë vënë nën hetim të ri. Po ashtu, ish-ministri i Jashtëm Boerge Brende, aktualisht udhëheqës i Forumit Ekonomik Botëror, si dhe ambasadorja Mona Juul dhe bashkëshorti i saj Terje Roed-Larsen po shqyrtohen për lidhje me Epsteinin.
Të premten, Princesha Mette-Marit kërkoi sërish falje në një deklaratë zyrtare të pallatit, duke përmendur veçanërisht mbretin dhe mbretëreshën, për lidhjet e saj me Epstein. Dokumentet më të fundit amerikane tregojnë shkëmbim të gjerë email-esh me të, edhe pas dënimit të tij për abuzim me fëmijë në vitin 2008.
Ministria e Jashtme norvegjeze tha se do të kërkojë heqjen e imunitetit diplomatik të Jagland, ish-kryetarit të Këshillit të Evropës (2009–2019), për të mundësuar hetimet policore. Këshilli i Evropës tha se kishte kryer një hetim të brendshëm në dhjetor dhe janar, pas publikimit të dokumenteve të Epsteinit në nëntor, dhe se “veprime të mëtejshme do të vendosen sipas nevojës”
Sipas mediave norvegjeze, shumica e partive në parlament duket të mbështesin një hetim të pavarur mbi Ministrinë e Jashtme, megjithëse kryeministri Jonas Gahr Stoere preferon që hetimi të kryhet nga vetë parlamenti.
Të gjitha figurat e përfshira, përfshirë Juul dhe Roed-Larsen, janë të njohura për lidhje me Epsteinin, por dokumentet e reja zbulojnë më shumë detaje rreth shkëmbimeve dhe kontakteve të tyre. Avokati i Roed-Larsen tha se klienti i tij nuk dyshohet për ndonjë vepër penale dhe është i gatshëm të bashkëpunojë plotësisht me autoritetet, megjithëse 78-vjeçari ndodhet në rehabilitim pas një goditjeje në tru.
Skandali ka rritur presionin mbi familjen mbretërore norvegjeze, e cila përballet edhe me sfida të tjera. Djali i Princeshës Mette-Marit, Marius, aktualisht po përballet me gjyq për akuzat e përdhunimit dhe dhunës në familje.
Top Channel
