Kthimi i njerëzimit në Hënë është shtyrë përsëri, pasi NASA njoftoi se po shtyn nisjen e misionit me pilot Artemis 2 për të paktën një muaj, pas problemeve teknike të regjistruara në një provë kritike para nisjes.
Fillimisht, NASA kishte synuar 8 shkurtin si datë nisjeje për misionin e parë Artemis me ekuipazh, i cili do të dërgojë katër astronautë në një udhëtim 10-ditor rreth Hënës dhe kthim në Tokë. Megjithatë, data është shtyrë pasi ndodhën probleme gjatë një prove gjenerale me lagështirë, një simulim në shkallë të plotë i procedurës që i paraprin nisjes.
“Inxhinierët u përballën me disa sfida gjatë testit dy-ditor dhe arritën shumë nga objektivat kryesorë”, tha NASA, duke shtuar se nevojitet më shumë kohë për të analizuar të dhënat dhe për të përsëritur procesin.
Sipas agjencisë amerikane, data më e hershme e mundshme e lëshimit tani është zhvendosur në mars. Ekzistojnë pesë “dritare” të disponueshme për lëshim nga Qendra Hapësinore Kennedy në Florida, më 6, 9 dhe 11 mars. Nëse lëshimi nuk është i mundur, atëherë data të reja do të pasojnë në prill.
Prova gjenerale filloi zyrtarisht më 31 janar dhe përfshinte aktivizimin e plotë të dy fazave të raketës së Sistemit të Lansimit në Hapësirë (SLS) dhe karikimin e baterive të kapsulës së ekuipazhit Orion .
Problemi më serioz lindi gjatë procesit të mbushjes së rezervuarëve me më shumë se 700,000 gallonë hidrogjen të lëngshëm dhe oksigjen të lëngshëm. Inxhinierët zbuluan një rrjedhje hidrogjeni në një lidhje karburanti në raketë, një problem i ngjashëm me atë që shkaktoi vonesa të mëdha në Artemis 1 në vitin 2022.
Edhe pse ekipi i lëshimit arriti të mbushte rezervuarët, një rritje në shkallën e rrjedhjeve pak para përfundimit të numërimit mbrapsht çoi në ndërprerjen e testit disa minuta para përfundimit të tij.
Ekuipazhi i Artemis 2 – Reed Wiseman, Victor Glover, Christina Koch dhe astronauti kanadez Jeremy Hansen – nuk do të udhëtojnë për në Florida për momentin.
Kur misioni të zhvillohet më në fund, ai do të ketë rëndësi historike: do të jetë hera e parë që nga viti 1972, pas Apollo 17, që njerëzit do të udhëtojnë përtej orbitës së ulët të Tokës.
Top Channel
