Muret e shtëpisë së të moshuarve Çela në Durrës janë ende të lagura.
Më 6 janar, uji vërshoi papritur dhe për tri ditë rresht pushtoi banesën, duke lënë pas dëme të shumta, jo vetëm materiale. Për ta ishte si një luftë me armikun në dy fronte.
Të ardhur nga Kuçova familjarisht, 27 vite më parë, Petrefi dhe Nexhmija jetojnë vetëm. Të martuar që nga mosha 18-vjeçare dhe prindër të 5 fëmijëve, ata kanë ndërtuar jetën e tyre me punë dhe sakrifica. Tri javë pas përmbytjes, shtëpia mbetet e ftohtë dhe plot lagështi, duke i detyruar të qëndrojnë të veshur trashë dhe brenda saj.
Ditët e fundit, falë ndihmës së fëmijëve dhe të mbesës që erdhi nga Greqia, po përpiqen të rikthejnë ngadalë normalitetin. Por ajo që mbeti më shumë pas është pasiguria. Kuptuan se të moshuarit që jetojnë vetëm si ata janë të pafuqishëm dhe më shumë se kurrë vlen të kesh pranë njerëz që kujdesen për ty.
Top Channel
