Timothée Chalamet bëhet aktori më i ri me tre nominime për çmimin Oscar, arrin këtë sukses që nga legjenda Marlon Brando 22/01 19:09
Procesi i hartimit të dokumenteve që synojnë përfundimin e luftës në Ukrainë është në fazën e fundit, tha Presidenti i vendit Volodymyr Zelensky nga Davos, pas takimit të tij me Presidentin e SHBA-së Donald Trump, duke vënë në dukje se konsultimet tani janë në një fazë të avancuar.
Në fakt, siç theksoi ai, në ditët në vijim sipas Sky News një takim trepalësh i ekipeve teknike nga SHBA-ja, Ukraina dhe Rusia do të mbahet në Emiratet e Bashkuara Arabe për të finalizuar detajet e fundit.
Presidenti ukrainas tha se ekipet e Shteteve të Bashkuara dhe Ukrainës po punojnë “pothuajse çdo ditë” për të arritur një marrëveshje që mund të çojë në përfundimin e konfliktit. Siç theksoi ai, procesi po zhvillohet me një ritëm intensiv, i cili sipas tij pasqyron vullnetin e të dyja palëve për të bërë përparim të konsiderueshëm.
“Ukraina po punon me ndershmëri dhe vendosmëri të plotë, dhe kjo po sjell rezultate”, tha Zelensky, duke shtuar se tani “Rusia gjithashtu duhet të përgatitet për t’i dhënë fund kësaj lufte dhe për të ndaluar këtë agresion”.
Edhe pse presidenti ukrainas nuk dha detaje rreth përmbajtjes së dokumenteve në përgatitje e sipër, përmendja e tij se ato janë “pothuajse gati” sugjeron që bisedimet kanë kaluar nga faza e pozicioneve të përgjithshme në propozime më specifike, me Uashingtonin që mban një rol qendror në përpjekjet e ndërmjetësimit.
Në deklaratat e bëra më parë nga Donald Trump, ai theksoi se “tani kemi paqe në Lindjen e Mesme”, përsëriti pretendimin e tij se ka zgjidhur tetë luftëra dhe shtoi se “së shpejti do të vijë një tjetër, ajo që mendova se do të ishte e lehtë”, por që doli të ishte më e vështira, duke lënë të kuptohet ajo në Ukrainë.
Rreth 29,000 njerëz, kryesisht ushtarë, humbën jetën vitin e kaluar, vazhdoi Trump, duke folur për një çmim “të tmerrshëm” të luftës, ndërsa shtoi se “po bëjmë përparim të madh” në bisedimet e paqes.
Top Channel
