Gabimi me kosto 44 miliardë dollarë, Bithumb shpërndan 620,000 bitcoin tek klientët e saj të kriptomonedhave 07/02 19:24
Regjimi iranian ka vrarë të paktën 16.500 persona dhe ka plagosur mbi 330.000 të tjerë, ndërsa vazhdon të godasë pa mëshirë protestuesit, madje edhe civilë të papërfshirë, gjatë protestave mbarëkombëtare kundër qeverisë, thuhet në një raport të ri tronditës.
Numri alarmues i viktimave, shumë më i lartë se rreth 3.100 të verifikuar nga grupet aktiviste, u detajua në një raport të ri nga mjekë në terren që po trajtojnë viktimat mes masakrës, raportoi Sunday Times.
Shifrat shqetësuese, të përpiluara nga tetë spitale kryesore dhe 16 departamente urgjence, tregojnë se midis 16.500 dhe 18.000 persona janë vrarë, me shumicën e viktimave që besohet të jenë nën moshën 30 vjeç.
“Kjo është një nivel krejtësisht i ri brutaliteti,” tha profesori Amir Parasta, një kirurg okulist iraniano-gjerman, i cili foli për median në emër të dhjetëra profesionistëve mjekësorë në Teheran.
“Në vitin 2022 përdornin plumba gome dhe armë me fishekë për të nxjerrë sytë. Këtë herë po përdorin armë të gradës ushtarake dhe ajo që po shohim janë plagë nga plumbat dhe copëzat e predhave në kokë, qafë dhe kraharor,” vazhdoi ai.
“Kam folur me dhjetëra mjekë në terren dhe ata janë vërtet të tronditur dhe duke qarë. Këta janë kirurgë që kanë parë luftë.” Sipas raportit, edhe 330.000 deri në 360.000 persona të tjerë janë plagosur, përfshirë fëmijë dhe gra shtatzëna.
Të paktën 1.000 persona kanë humbur një sy, me një spital në Teheran që raporton 7.000 dëmtime të syve.
“Ka aq shumë dëmtime të syve nga armët me fishekë sa që nuk dimë kë të trajtojmë më parë,” citohet të ketë thënë një okulist. Protestat, të cilat shpërthyen më 28 dhjetor, u përhapën me shpejtësi në të 31 provincat, duke u shndërruar nga demonstrata kundër një ekonomie në kolaps në kërcënimin më serioz për sundimtarët klerikë të Iranit që nga Revolucioni Islamik i vitit 1979. Regjimi u përgjigj me forcë dërrmuese, duke dislokuar Gardën Revolucionare Islamike dhe milicinë e saj Basij për të shtypur trazirat, sipas grupeve të të drejtave të njeriut dhe dëshmive të dëshmitarëve.
Ndërsa vrasjet shtoheshin, autoritetet vendosën një bllokim pothuajse të plotë të internetit më 8 janar, duke e zhytur Iranin në errësirë digjitale për më shumë se tetë ditë — një veprim që shihet gjerësisht si përpjekje për të fshehur masakrën dhe për të parandaluar përhapjen e pamjeve jashtë vendit.
“Ky është gjenocid nën mbulesën e errësirës digjitale,” i tha Parasta Times-it.
“Ata thanë se do të na vrisnin derisa kjo të ndalonte dhe pikërisht këtë po bëjnë.”
Pamje grafike që dolën në dritë pavarësisht bllokimit treguan rreshta trupash të grumbulluar brenda dhe jashtë morgjeve, përfshirë qendrën mjekoligjore Kahrizak në Teheran, ndërsa familje të dëshpëruara kërkonin të afërmit e zhdukur mes kërcënimeve dhe frikësimeve. Një person që u largua nga Irani i tha medias se Garda Revolucionare “i qëlloi të gjithë me breshëri” një natë dhe po “përpiqeshin qetësisht të synonin kokat e njerëzve”.
“Snajperë në çatitë e ndërtesave po qëllonin njerëzit pas koke,” kujtoi një tjetër.
Mjekët treguan se shumë viktima kanë vdekur për shkak të mungesës kritike të gjakut, raportoi media.
Pavarësisht se stafi mjekësor në disa spitale ka dhuruar gjak për të shpëtuar jetë, forcat e sigurisë kanë bllokuar transfuzionet në disa raste.
“Luftojmë për orë të tëra për të shpëtuar jetë, vetëm për t’i humbur pacientët sepse nuk u lejohet të marrin transfuzion gjaku,” tha një kirurg nga Teherani. Masakra po shkakton tensione me SHBA-në, pasi presidenti Trump urdhëroi Pentagonin të përgatiste opsione për sulme ushtarake pas raportimeve se Irani po planifikonte ekzekutime masive.
Shtëpia e Bardhë u tërhoq papritur kur Teherani thuhet se pezulloi varjet.
Top Channel
