Agjentët federalë vranë shoferen në Minneapolis/ Trump flet për vetëmbrojtje, klimë e tensionuar dhe demonstrata në qytet 07/01 22:31
Kryeministri i Groenlandës, Jens Frederik Nielsen, falënderoi udhëheqësit europianë për mbështetjen e tyre të palëkundur kundër pretendimeve të Donald Trump dhe i bëri thirrje qeverisë amerikane të angazhohet në dialog.
“Në një situatë ku presidenti amerikan ka përsëritur se Shtetet e Bashkuara janë serioze në deklaratat e tyre për Groenlandën, kjo mbështetje nga aleatët tanë të NATO-s është veçanërisht e rëndësishme dhe e qartë”, shkroi Jens Frederik Nielsen në Facebook.
“Dua t’u bëj thirrje përsëri Shteteve të Bashkuara të fillojnë një dialog të respektueshëm përmes kanaleve të duhura diplomatike dhe politike dhe të përdorin strukturat ekzistuese bazuar në marrëveshjet që janë tashmë në fuqi me SHBA-në”, shkroi kryeministri i Groenlandës.
Më herët sot, udhëheqësit e Francës, Gjermanisë, Mbretërisë së Bashkuar, Italisë, Spanjës, Polonisë dhe Danimarkës lëshuan një deklaratë të përbashkët duke deklaruar se Danimarka dhe Groenlanda, dhe vetëm ata, mund të vendosin për çështjet që kanë të bëjnë me Danimarkën dhe Groenlandën.
Groenlanda i përket popullit të saj dhe vetëm Danimarka dhe Groenlanda mund të vendosin për çështjet që kanë të bëjnë me marrëdhëniet e tyre, deklaruan ata.
“Nuk do të ndalemi së mbrojturi parimet e Kartës së Kombeve të Bashkuara, të cilat përfshijnë sovranitetin, integritetin territorial dhe paprekshmërinë e kufijve”, deklaruan udhëheqësit evropianë.
“Groenlanda i përket NATO-s, NATO e ka bërë të qartë se rajoni i Arktikut është një përparësi dhe aleatët europianë po shtojnë veprimet e tyre”, thuhet në tekst.
Siguria në Arktik duhet të arrihet kolektivisht, në koordinim me aleatët e NATO-s, përfshirë Shtetet e Bashkuara, thekson deklarata e përbashkët e europianëve.
Top Channel
